Roots Inn Svaneti – ასე ჟღერს იმ საოცარი გარემოს სახელწოდება, რომელიც ქვემო სვანეთში მდებარეობს. ის ჯერ მხოლოდ ექვს თვეს ითვლის, თუმცა, მის მიმართ ინტერესი მზარდია როგორც ქართველების, ისე – უცხოელების შემთხვევაში. დეტალურად, რა სერვისებს სთავაზობს ის დამსვენებლებს – „თბილისი თაიმსს“ თეონა ფარჯიანი ესაუბრა.
კოტეჯები ქვემო სვანეთში, ლენტეხის რაიონიდან 30 კილომეტრში მდებარეობს, ზღვის დონიდან 1589 მეტრზე. სოფელი არის ნასახლარი და სახელად ლამფალაში ჰქვია. ჩვენი კოტეჯებიდან უშგული 43 კილომეტრშია სამანქანო გზით, ხოლო თუ ჰაიკინგი თქვენი სტიქიაა, 13 კილომეტრში შეგიძლიათ, იხილოთ ეს საოცრება.
რამდენი ხანია, რაც Roots Inn Svaneti არსებობს?
Roots Inn Svaneti, როგორც ჩვენ ვუწოდეთ და ვთარგმით, როგორც – ფესვები სვანეთში, უკვე 6 თვეა, არსებობს. კოტეჯების მშენებლობა ოქტომბერში დასრულდა და დამსვენებლებს მომავალ წელს მივიღებთ. ეს არის პირველი აფრეიმ სტილის პროექტი, რომელიც ქვემო სვანეთში აშენდა. იმედი გვაქვს, რეგიონი ტურისტულად ძალიან მალე დაიტვირთება.
რა სერვისებს სთავაზობთ მომხმარებლებს?
კოტეჯები გათვლილია 4 ადამიანზე და მაქსიმალურად შევეცადეთ, ჩვენი იმიჯი იყოს მყუდრო, სადა და კომფორტული. კოტეჯში ვთავაზობთ კვების სერვისს და ასევე მომავალ წელს შევთავაზებთ საცხენოსნო ტურებს. გვინდა რამდენიმე სათავგადასავლო ტურისტულო იდეის განხორციელება, თუმცა, ჯერჯერობით, ფინანსების მოძიების პროცესში ვართ.
ყველა სეზონზეა ის ხელმისაწვდომი?
დიახ, კოტეჯი გახსნიდან ხელმისაწვდომი იქნება ოთხივე სეზონზე.
საინტერესოა, როგორია უცხოელების დაინტერესება?
უცხოელები ჩვენს რეგიონს ხშირად სტუმრობენ. გვინდა, რომ სხვადასხვა პლატფორმაზე აქტიურად ვიყოთ წარმოდგენილები და მივიქციოთ როგორც ქართველი, ასევე, უცხოელი ტურისტის ყურადღება. ამ ეტაპზე, გვიკავშირდებიან, თუმცა, სერვისს ვერ ვთავაზობთ, რადგან ჯერ კიდევ მიმდინარეობს გარე სივრცის მშენებლობის პროცესი.
