ბუნებრივია, ყველასთვის სასიამოვნოა გარემო, რომელშიც ყველა დეტალი გემოვნებით არის შერჩეული. როდესაც ჩვენს სახლში თუ სამუშაო სივრცეში თვალს მუდამ მყუდრო ფერები და გამორჩეული წვრილმანები ხვდება, იქ ყოველი წუთის გატარება სახალისოა. EBRA სწორედაც რომ ამ ყველაფერზე ზრუნავს. ის მომხმარებელს აძლევს საშუალებას, გარშემო ჰქონდეს ყველაფერი დახვეწილი და ესთეტიკური.
უფრო დეტალურად, „თბილისი თაიმსს“ კერამიკის შემოქმედებითი სახელოსნოს – EBRA-ს დამფუძნებელი, ლევან ებრალიძე ესაუბრა.
რამდენი ხანია, რაც EBRA არსებობს?
2 წელია, რაც საზოგადოების წინაშე წარვდექით ჩვენი ნამუშევრებით. თუმცა, მანამდე, საკმაოდ ხანგრძლივი პერიოდი სახელოსნოს მოწყობა-აღჭურვას და მომზადებას დასჭირდა.
ზოგადად, სახელოსნო უძირო ჭასავითაა, მუდმივად ითხოვს ახალ ინსტრუმენტებს, დანადგარებს, მასალებს და კიდევ ათას წვრილმანსა თუ მსხვილმანს…
კონკრეტულად რას ამზადებთ?
სიხარულის, სითბოს და სიყვარულის მომნიჭებელ ნივთებს, კონკრეტულად კი, ხელით მოხატულ, ექსკლუზიურ კერამიკას, რაშიც მოიაზრება: სანათები, ნიჟარები, მრავალფეროვანი ჭურჭელი, ქოთნები, ინტერიერის გასაფორმებელი დეკორი და ასე შემდეგ. ყველაფერი იქმნება ხელით და თითოეულ ნაკეთობაში რამდენიმე ადამიანის შრომაა ჩადებული.
რა არის ის ხაზი, რაც თქვენს ნამუშევრებს აერთიანებს?
ჩვენი ნამუშევრების მფლობელთა შეფასებებს თუ დავესესხებით, ეს არის: გემოვნება, ფორმისა და მოხატულობის დახვეწილი შეხამება და შესრულების მაღალი ხარისხი. სწორედ ესაა ჩვენი წარმოების მიზანიც და შემოქმედებითი ხაზიც, რომელიც მიმართულია მუდმივად განვითარებისაკენ.
EBRA-ს სტუდიაში რუდუნებით შექმნილი პროდუქტი ერთდროულად ესთეტიკური გარემოს მოწყობასაც ემსახურება და თან გამოყენებითიცაა, რაც ხალხისთვის ხშირად მნიშვნელოვანია.
ამასთან ერთად, მოგეხსენებათ, ხელნაკეთი ნივთები, მით უმეტეს, თიხისგან შექმნილი, განსაკუთრებულ ენერგეტიკას ატარებენ და პოზიტიურ აურას ქმნიან. ჩვენს სახელოსნოში გამოძერწილ-მოხატული და ცეცხლში გამომწვარი თითოეული ნამუშევარი დიდი სიყვარულით, მონდომებით და, რაც მთავარია, პასუხისმგებლობით იქმნება. აი, ეს არის გამაერთიანებელი ხაზი ჩვენს სტუდიაში მოღვაწე გუნდისა და მის მიერ შექმნილი ნამუშევრებისა.
როგორც ვიცი, ადამიანებს სხვადასხვა აქტივობას სთავაზობთ. ამის შესახებ გვიამბეთ.
ბევრი მოგვმართავდა შესწავლის სურვილით და გადავწყვიტეთ, გაგვეხსნა კერამიკის შემსწავლელი კურსები. ახლაც იმართება ვორქშოპები თიხის ძერწვასა და კერამიკის მოხატვაში. ძალიან მეგობრული და სახელოსნოსთვის დამახასიათებელი თბილი ატმოსფერო გვაქვს. შესაბამისად, მოსწავლეები ისე ეფლობიან შემოქმედებით პროცესში, რომ დროის შეგრძნებასაც კი კარგავენ ხოლმე. ძალიან სასიამოვნოა იმის ხილვა, თუ როგორ სიხარულს ანიჭებთ საკუთარი ხელით შექმნილი ნამუშევრები.
რა უახლოესი გეგმები გაქვთ?
გვინდა, მასშტაბები გავზარდოთ როგორც წარმოების, ისე – ცნობადობის თვალსაზრისით. ხშირად უკვირთ პირველად მნახველებს, თუ რატომ არ იცნობდნენ აქამდე „ებრას“ შემოქმედებით სახელოსნოს და ახლა იმედი გვაქვს, რომ, თქვენი დახმარებითაც, უფრო მეტი ადამიანი ეზიარება ჩვენს შემოქმედებას.
