GlowcandleGeo – სურნელოვანი, ფერადი და გამორჩეული საქმიანობა, რომელსაც საფუძველი არცთუ ისე დიდი ხნის წინ ჩაეყარა. ნანუკა ქობულაძისთვის იდეა – ეწარმოებინა მიმზიდველი ფორმების, სურნელოვანი სანთლები, წარმატებული აღმოჩნდა. ამ მხრივ, ის თვითნასწავლია და „თბილისი თაიმსს“ დეტალებს უყვება.
კონკრეტულად, რას ამზადებთ?
2 წლის წინ დავინტერესდი სანთლებით, თუმცა, მინდოდა რაიმე განსხვავებული სანთლის მიმართულება, რომელიც საქართველოში არ იყო. სწორედ ამიტომ, გადავწყიტე – ტკბილეულის მხრივ დამეწყო სანთლის წარმოება. დაახლოებით, 1 წელი დამჭირდა, რომ კარგად შემესწავლა, რადგან ვარ თვითნასწავლი.
რისგან იქმნება თქვენი პროდუქცია?
ჩემი პროდუქცია იქმნება როგორც სოიოს ცვილისგან (ბიოლოგიურად სუფთა პროდუქტი), ასევე, პარაფინისგან და ემატება სხვადასხვა სურნელის ეთერზეთი, რომელიც საოცარ სურნელს აყენებს ოთახში როგორც წვის დროს, ასევე, წვის გარეშეც.
რა არის ის დეტალი, რაც მათ გამოარჩევს?
ჩემი პროდუქცია არის ხელნაკეთი – Handmade, რაც მიმაჩნია, რომ ჩემს პროდუქტს განსაკუთრებულს ხდის, რადგან შემიძლია, მოვარგო მომხმარებლის გემოვნებას როგორც ფორმაში, ასევე, სურნელსა და ფერში.
ყველაზე მნიშვნელოვანი კი არის, რომ ვაწარმოებთ ღონისძიების თუ დღესასწაულის შესაფერის სანთლებს: ქალთა დღე, საახალწლო, Halloween, ბავშვთა დღე და ა.შ. დავიწყეთ უკვე საახალწლო სამზადისიც და ვიღებთ კორპორატიულ შეკვეთებს.
გარდა ამისა, სხვა რაიმეს თუ აწარმოებთ?
ჯერჯერობით, წარმოებაში არ მაქვს, თუმცა, სამომავლოდ ვფიქრობ, დავამატო როგორც თიხის პროდუქცია სანთლისთვის, ასევე, საპონიც, რომელზეც ხშირად გვეკითხება მომხმარებელი და ელოდება ჩვენგან სიახლეებს ამ მიმართულებით.
დაინტერესების შემთხვევაში შეგიძლიათ, გვიპოვოთ როგორც Facebook-ზე , ასევე, Instagram-სა და Tiktok-ზე : GlowcandleGeo
