თითოეული ადამიანის ცხოვრებაში დგება ეტაპი, როდესაც მან პროფესია უნდა აირჩიოს. ამ პროფესიის კვალდაკვალ, ჩვენს ყოველდღიურობაში შესაძლოა, გამოიკვეთოს საქმიანობა, რომელიც მთლიანად მოგვიცავს და ყოველი დეტალი განსაკუთრებულ სიამოვნებას მოგვანიჭებს.
ნინო ყორანაშვილი პროფესიით იურისტია, ასოცირებული პროფესორი. ჭურჭლის გაფორმება მისთვის საყვარელ საქმიანობად გერმანიაში იქცა. სურვილმა, საკუთარი ხელებით შეექმნა ლამაზი ნამუშევრები, ის თავისი ბრენდის შექმნის აუცილებლობამდე მიიყვანა. ნინო „თბილისი თაიმსს“ ესაუბრა.
„სულ მინდოდა, რაღაც საკუთარი ხელით მეკეთებინა. პირველად მსგავსი ნამუშევრები გერმანიაში ვნახე. კეთების პროცესს რამდენჯერმე დავესწარი და მერე რატომღაც მეც მომინდა დამზადება. სირთულეებს რას შეეხება – აქ ძალიან ძნელად და თითქმის არ იშოვება ის მასალა, რასაც ვიყენებ და მიწევს გამოწერა. ახალი დეტალების შესწავლა მუშაობაში თავისით მოდის. მაქვს კიდევ ერთი გატაცება, რომელიც უკვე საქმედ ვაქციე, ეს არის სახის მოვლის საშუალებები“.
როგორც ნინო აღნიშნავს, ნამუშევრებს სახლში ამზადებს, თუმცა, აქვს სურვილი, ჰქონდეს საკუთარი სახელოსნო.
„ამ ეტაპზე, სახლში ვმუშაობ, თუმცა, ძალიან მინდა, მქონდეს პატარა სახელოსნო, სადაც, რა თქმა უნდა, მეტად მშვიდად შევქმნი ნამუშევრებს. მუშაობის პროცესში ათასი ფიქრი და ოცნება მოდის. ყველა შეკვეთა და დამკვეთი განსხვავებულად ითხოვს,ზოგს ძალიან ეჩქარება,ზოგიც დამიჯერეთ, ერთი კვირა მითანხმებს დეტალებს. მეც მაქსიმალურად ვცდილობ, შევქმნა ზუსტად ისეთი, როგორიც მათ მოეწონებათ. გამზადებული თითქმის არასდროს არ მაქვს, ამიტომ, დამკვეთს დაახლოებით ერთი კვირა უწევს ლოდინი (რაოდენობას გააჩნია).
იმედი მაქვს, ახლო თუ არა, შორეულ მომავალში მაინც, პატარა, ულამაზესი მაღაზია-სახელოსნო მექნება, სადაც მომხმარებელს მეტად დიდ და საინტერესო არჩევანს შევთავაზებ. ძირითადად, ეს ჭურჭელი ახალი წლის დღეებში სუფრის გასაწყობად უნდათ ან სიძე დედოფლის მაგიდის გასაფორმებლად. თუმცა, ხშირად თითო-თითოც შეუკვეთავთ უბრალოდ ვიტრინისთვის“.
