კალიმბა – საინტერესოა, რამდენ ჩვენგანს აქვს ინფორმაცია ამ გამორჩეული საკრავის შესახებ? შესაძლებელია თუ არა ჩვენს ქვეყანაში ამ მუსიკალური ინსტრუმენტის შეძენა? ამ კითხვებზე პასუხი უკვე არსებობს. „წკაპი“ – ასე ჰქვია გზას, რომელიც ჩვენ კალიმბასთან გვაკავშირებს.
დიდი ხანი არ არის, რაც ის ქართულ ბაზარზე არსებობს. ამის მიუხედავად, მის მიმართ ინტერესი თავიდანვე დიდი იყო. „თბილისი თაიმსს“ თამარ ჯავახიშვილი ესაუბრა.
რამდენი ხანია, რაც „წკაპი“ არსებობს?
„წკაპი“ ქართულ ბაზარზე 2021 წლის თებერვალში გამოჩნდა, იდეა კი 2020 წლის ბოლოს გაჩნდა, მას შემდეგ, რაც ერთ–ერთ უცხოურ საიტზე შემთხვევით აღმოვაჩინე ჩემთვის მანამდე უცნობი მუსიკალური ინსტრუმენტი – კალიმბა. მაშინვე დავიწყე ინფორმაციის მოძიება, რათა გამეგო მისი თავისებურებები. საქართველოშიც ვეძებე, მაინტერესებდა – თუ იყო შესაძლებელი, ჩვენს ქვეყანაში შემეძინა, მაგრამ ძებნა უშედეგოდ დასრულდა. სწორედ აქედან გაჩნდა „წკაპის“ იდეაც და მალევე მეგობართან ერთად დავიწყე ამ საუცხოო ინსტრუმენტის წარმოება თბილისში. მიზნად დავისახეთ, რომ ეს ჯადოსნური საკრავი საქართველოშიც გაგვევრცელებინა და საზოგადოებაში აგვემაღლებინა მის მიმართ ცნობადობა. დღემდე ამ მიზანს მივყვებით და გვსურს, რაც შეიძლება მეტი ადამიანის ყოველდღიურობის ნაწილი გახდეს კალიმბა, რომელიც თავისი ტკბილი ხმით დადებითი ენერგიით ავსებს მსმენელს.
საკრავის შესახებ რომ გვიამბოთ
კალიმბა უკავშირდება აფრიკულ ტრადიციულ საკრავებს, რომელთაც მრავალსაუკუნოვანი ისტორია აქვთ. მის წინაპრად ერთ–ერთი მათგანი – მბირა მიიჩნევა. ინგლისელი ეთნომუსიკოლოგი Hugh Tracy აფრიკაში მოგზაურობის დროს გაეცნო ამ ინსტრუმენტს და მასზე დიდი შთაბეჭდილება მოახდინა მისმა ჟღერადობამ. მას სურდა, ეს საკრავი დასავლეთის ქვეყნებშიც გაევრცელებინა. შესაბამისად, ყველასთვის ცნობილი ნოტების სისტემა (დო, რე, მი..) მოარგო ამ ინსტრუმენტს, რათა თეთრკანიანებისთვის უფრო მარტივი ყოფილიყო მასზე დაკვრა და 1950-იან წლებში მსოფლიოს ახალი ინსტრუმენტი – კალიმბა წარუდგინა.
რისგან ამზადებთ მათ?
კალიმბებს ვამზადებთ სხვადასხვა მასალისგან. ყველაზე ხშირად ვიყენებთ ხის მასალას, რომელსაც გულდასმით ვარჩევთ, რადგან მის ხარისხს დიდი მნიშვნელობა აქვს იდეალური პროდუქციის შესაქმნელად. გარდა ამისა, გვაქვს ორგმინისგან დამზადებული მოდელებიც, რომლებიც აკრილის კალიმბების სახელით მოიხსენიება. ამასთანავე, რამდენიმე თვის წინ დავიწყეთ ეპოქსიდზე მუშაობაც და ხის მასალასთან კომბინაციაში დავამზადეთ სხვადასხვა მოდელები. მათი განსაკუთრებულობა იმაში მდგომარეობს, რომ უნიკალური ნამუშევრები იქმნება ეპოქსიდის გამოყენების დროს, რადგან ორი ერთნაირი მოდელის დამზადება თითქმის შეუძლებელია ამ მასალის თავისებურებებიდან გამომდინარე.
როგორია მის მიმართ ინტერესი?
არ გაგვკვირვებია, რომ კალიმბის მიმართ ინტერესი „წკაპის“ დაარსების დღიდან დიდი იყო და ამ დროის განმავლობაში ვცდილობთ, ეს დაინტერესება უფრო და უფრო გავაძლიეროთ მრავალფეროვანი პროდუქციითა და სიახლეებით, რომლებსაც ხშირად ვთავაზობთ ჩვენს მომხმარებლებს. კალიმბაზე დაკვრა მარტივია და ყველას შეუძლია, მუსიკალური განათლების გარეშეც. ინტერნეტის საშუალებით უამრავი დამხმარე ინფორმაციის ნახვაა შესაძლებელი. გამომდინარე აქედან, განურჩევლად ასაკისა და სქესისა, ნებისმიერი მუსიკის მოყვარული ადამიანისთვის სასურველი საკრავია. განსაკუთრებით დიდია კალიმბის მიმართ დაინტერესება საახალწლო პერიოდში, როცა საჩუქრების თემა ყველაზე აქტუალური ხდება. ამის მიზეზი კი, თავისთავად, ინსტრუმენტის ორიგინალურობაა, რაც საჩუქარს უფრო გამორჩეულს ხდის.
ქუჩის მარკეტებზეც ვიღებთ ხოლმე მონაწილეობას სხვადასხვა ქალაქში, სადაც საშუალება გვეძლევა, პირადად შევხვდეთ ჩვენს მომხმარებლებს და ამავდროულად, კიდევ უფრო მეტ ადამიანს ვაჩვენოთ ჩვენი პროდუქცია. როდესაც მსგავს გამოფენაში პირველად მივიღეთ მონაწილეობა, ხალხი გაოცებული უყურებდა კალიმბებს, როცა უცხოელი ტურისტები მარტივად ცნობდნენ ინსტრუმენტს. დროთა განმავლობაში ეს ვითარებაც ნელ–ნელა იცვლება და დიდი ბედნიერებაა ჩვენთვის, როდესაც ჩვენი პროდუქციის დანახვით გახარებულ ადამიანებს და მათ აციმციმებულ თვალებს ვხედავთ ხოლმე.
საინტერესო ვიზუალისაა თქვენი პროდუქტი – მათ საკუთარი გემოვნებით ქმნით?
ჩვენთვის ეს საქმიანობა განსაკუთრებით საინტერესო იმიტომაა, რომ არაა ერთფეროვანი და მოსაბეზრებელი, რუტინული საქმე. დიზაინების დიდი ნაწილი ჩვენი გემოვნებითაა შექმნილი. იდეებზე ფიქრი, შესაბამის პროგრამაში დამუშავება, დამზადება და მომხმარებლებისთვის ახალი მოდელების წარდგენა ჩვენი საყვარელი პროცესია. გარდა ამისა, მომხმარებლებს საშუალება აქვთ, სასურველი დიზაინით შეგვიკვეთონ კალიმბები და ეს კიდევ უფრო დიდი და საინტერესო გამოწვევაა ჩვენთვის, თანაც ძალიან საპასუხისმგებლო. მათ სურვილებს რომ რეალობად ვაქცევთ და პასუხად დადებით უკუკავშირს ვიღებთ, უსაღვრო სტიმულს გვანიჭებს ეს ფაქტი, რაც იმის დასტურია, რომ მომხმარებლების ნდობას ვამართლებთ და ჩვენი მიზანიც სწორედ ესაა.
