„ხელოვნების სიყვარული ჩემმა ბავშვობამ განაპირობა, რომელიც ქართულ ტრადიციულ ცეკვებს და ფორტეპიანოს უკავშირდება. ჩემი მომავლის პროფესიაც მინდოდა, ახლოს ყოფილიყო ხელოვნებასთან. ამ მიზეზით ავირჩიე მარკეტინგი ჩემი საქმიანობის მთავარ სფეროდ, რაც “ექსპოზიციის” მართვის პროცესშიც ძალიან მეხმარება“ – ამ სიტყვებს ლიკა ფუხაშვილი „თბილისი თაიმსთან“ საუბრისას ამბობს და ხელოვნების მიმართ საკუთარ დამოკიდებულებას აღწერს. „ექსპოზიცია“ მისი იდეების, მიზნებისა და სურვილების ერთობლიობით შეიქმნა. ჰობი, რომელიც მოგვიანებით მისთვის ბიზნესად იქცა, 2021 წლიდან იღებს სათავეს. უფრო დეტალურად, ლიკა თავად გვიყვება.
რამდენი ხანია, რაც არსებობს „ექსპოზიცია“?
“ექსპოზიცია” 2021 წლის ივნისში დაფუძნდა. მისი შექმნის იდეა პირადი საჭიროებებიდან გამომდინარე გაჩნდა, როდესაც ადგილობრივ ბაზარზე რენესანსული ხანის კერამიკულ ნაწარმს ვეძებდი. თუმცა, ვინაიდან უშუალოდ ამ მიმართულებით არცერთი ქართული დეკორატიული ბიზნესი არ ოპერირებს, ჩვენი მთავარი მიმართულება – რენესანსული ხანის რეპროდუქციები, საკმაოდ პოპულარული აღმოჩნდა და “ექსპოზიციამ” საქართველოს ბაზარზე მალევე დაიმკვიდრა თავი. რამდენიმე კვირაში მოთხოვნამ მიწოდებას გადააჭარბა და გაჩნდა სწრაფი ზრდის აუცილებლობა. განვითარების გზაზე Enterprise Georgia-ს გრანტი მოვიპოვე, რაც კიდევ უფრო დამეხმარა ძირითადი საშუალებების შეძენის და ასორტიმენტის გაზრდის პროცესში.
მისი დაფუძნების დღიდან პროდუქცია აქტიურად იყიდება ელექტრონული კომერციით, Facebook და Instagram გვერდების მეშვეობით. ასევე, ხშირად ვმონაწილეობ ისეთ გამოფენა-გაყიდვებში, როგორებიცაა: “100 ქალი მეწარმის ბაზარი” და Stall-ის ყოველკვირეული მარკეტი. ამასთან, USAID-ის ხელშეწყობით პროდუქცია 1 თვის განმავლობაში იყიდებოდა “სითი მოლსა” და “ბაზარი ორბელიანზე”, სადაც მომხმარებლებს შეეძლოთ, უფრო ახლოს გაეცნოთ “ექსპოზიციის” ნაკეთობები.
“ექსპოზიციის” კონკურენტული უპირატესობა მდგომარეობს იმაში, რომ პროდუქციის წარმოების სრული ციკლი საქართველოში ხდება. საინტერესოა ის ფაქტიც, რომ საწყის ეტაპზე “ექსპოზიცია” და კერამიკული ნაკეთობების შექმნა ჩემთვის წარმოადგენდა ჰობს. თუმცა, მას შემდეგ, რაც დავინახე ამ ბიზნესის პოტენციალი, გამოვიკვლიე და დავტესტე ბაზარი, გადავწყვიტე – ჩემი ჰობი ბიზნესად მექცია.
რას სთავაზობთ მომხმარებლებს?
“ექსპოზიცია” ინტერიერისთვის განკუთვნილ დეკორატიულ ნივთებს აწარმოებს, რომელიც ამ ეტაპზე სკულპტურებს, სურნელოვან სანთლებს და ლარნაკებს მოიცავს. მისი მთავარი მიმართულება კი ხელოვნების ნიმუშების რეპროდუქციებია. მცირე ბიზნესი იკავებს კონკრეტულ ნიშას და ამავე მიმართულებით მსურს მისი გაფართოება. უახლოეს ვადებში იგეგმება აქსესუარების ხაზის განვითარებაც.
ნამუშევრებს რისგან ქმნით?
“ექსპოზიციის” ნაკეთობების უმრავლესობა კერამიკულ ნაწარმს წარმოადგენს, თუმცა, წარმოების პროცესში ასევე ვიყენებ პარაფინს, სოიოს ცვილს, ეპოქსიდს და პოლიეთანს.
ამ მხრივ, ცოდნა როგორ მიიღეთ?
საწყისი ცოდნა Youtube-ის მეშვეობით მივიღე. რამდენიმე კვირის განმავლობაში ვიკვლევდი წარმოების პროცესს, საათობით ვაკვირდებოდი მცირე დეტალებსაც კი. შემდეგ, ამ სფეროს გამოცდილ და პროფესიონალ კადრებს შევხვდი და მათი დახმარებით ჩემი გაურკვეველი დეტალები აღმოვფხვერი. რის შემდეგაც
დავიწყე მომწოდებლების ძიება და სხვადასხვა სახის მასალით პროდუქციის პრაქტიკაში დატესტვის ეტაპზე გადავედი.
