სამყარო ნიჭიერი ადამიანებით ნამდვილად განებივრებულია. მათ შორის კიდევ უფრო გამორჩეულებიც არსებობენ. ასეთ ადამიანებს საკუთარ საქმიანობაში აქვთ ხელწერა, მახასიათებლები – რომელთა მეშვეობითაც მარტივი მისახვედრია, ვინ არის კონკრეტული პროდუქტის ავტორი.
ხელოვანებს ასეთი ხელწერა კიდევ უფრო განსაკუთრებულებს ხდის. ლაზარე გელაშვილი მხატვარია. ის შავითა და თეთრით ქმნის და პორტრეტებში საკუთარ ემოციებს გადმოსცემს. დეტალურად, ლაზარე „თბილისი თაიმსს“ ესაუბრა.
„ძირითადად, ვმუშაობ გრაფიკაში. მიყვარს, როდესაც ორი ფერით, ანუ შავით და თეთრით ვცდილობ, შევქმნა თითქოს ფერადი. ყველაზე ხშირად ვხატავ ფანქრებით და ნახშირით, ასევე, ძალიან მიყვარს კალმით მუშაობა.
ვფიქრობ, ჩემს ნახატებს რაც აერთიანებს, ეს არის თვალები, ხშირად მეუბნებიან, რომ, პორტრეტის დიდი სიზუსტით გადახატვის გარდა, მის თვალებში ვდებ ჩემი სულიერი სამყაროს ნაწილს. მართლაც, ხატვის დროს ვცდილობ, თვალებში დიდი გრძნობა ჩავდო. სწორედ ამიტომ, ყველა პორტრეტის დახატვას თვალებით ვიწყებ“.
როგორც ხელოვანი აღნიშნავს, ნამუშევრებს შეკვეთითაც ქმნის, თუმცა, ცხადია, ამ შემთხვევაში ის გარკვეულ ჩარჩოებში ექცევა.
„შეკვეთითაც ვხატავ, თუმცა, ასეთ დროს ისეთ გრძნობას ვერ გადმოვცემ, როგორიც მინდა, რომ ჩანდეს ნახატში. ზოგადად, ფოტოს არჩევას დიდ დროს ვანდომებ, შეკვეთის შემთხვევაში კი ამის საშუალება არ მეძლევა, თანაც დროში ვარ შეზღუდული.
ხელოვნების ყველა მიმართულება თავისებურად საინტერესოა ჩემთვის, თუმცა, განსაკუთრებად ვერ გამოვარჩევ ხატვის გარდა სხვა სფეროს. დღესდღეობით ხატვა ჩემი ცხოვრების განუყოფელი ნაწილია“.
