ყოველი ქვეყნის წინსვლას მისი თითოეული ნაწილის წარმატება განაპირობებს. ნებისმიერ სფეროში არსებული ცვლილებები, სიახლეები არის სახელმწიფოს სიძლიერის გარანტი.
ჯერ მხოლოდ სამი თვეა, რაც ოზურგეთში სამინანქრე სკოლა-სახელოსნო – „სამშვენისი“ გაიხსნა. ის ხელმისაწვდომია ნებისმიერი მსურველისთვის. დეტალურად, რას სთავაზობს სახელოსნო მოსახლეობას – „თბილისი თაიმსს“ სალომე გაბედავა ესაუბრა.
„უკვე სამი თვეა, რაც სკოლა-სახელოსნო გავხსენი. სექტემბრის თვიდან დავიწყე მუშაობა, უკვე ვიღებ მოსწავლეებს, რომლებიც ეუფლებიან ტიხრული მინანქრის ტექნოლოგიას.
პანდემიის დროს ყველას ძალიან ბევრი ფიქრის დრო გვქონდა, გადავწყვიტე თბილისიდან რაიონში (ოზურგეთში დაბრუნება). დაიბადა იდეა, რომ ეს სახელოსნო გამეკეთებინა და ჩემი ცოდნა და გამოცდილება რაიონის განვითარებისთვის გამომეყენებინა. ევროკავშირის მიერ დაფინანსებულ პროექტში გამარჯვებამ მომცა შესაძლებლობა, ჩემი ოცნებები რეალობად მექცია“.
სალომე დეტალურად გვიყვება, თუ რა მზადდება სახელოსნოში.
სახელოსნოში ვამზადებ საიუველირო ნაკეთობებს, ხის და მინანქრის სინთეზურ სამკაულებს, ტიხრული მინანანქრის ვერცხლის სამკაულებს. სხვადასხვა აქსესუარს. ნამუშევრები იქმნება ემოციის, გარემო პირობების, განწყობის საფუძველზე, ამიტომ, ინსპირაციის წყარო ბევრი რამ შეიძლება, გახდეს.
გარდა იმისა, რომ ეს სახელოსნო ჩემი იდეების ნაწილია, ასევე, მნიშვნელოვანია რაიონისთვისაც, რადგან ოზურგეთში მსგავსი სივრცე არ არსებოს, ამიტომ, დაინტერესება დიდია საზოგადოების მხრიდან, რადგან სახელოსნო ახალია, ვცდილობ, რაც შეიძლება მეტ ადამიანს მივაწვდინო ხმა, რათა გაიგონ “სამშვენისის” შესახებ.
ამბობს სალომე და ხაზს უსვამს, რომ ამ ეტაპზე მისი მიზანია, რაც შეიძლება მეტი ადამიანი დააინტეროს იმ მხრივ, რქ მიზნითაც სახელოსნო დაარსდა.
„ამჟამად, აქცენტი მოსწავლეებზე მაქვს. მინდა, რაც შეიძლება მეტი ადამიანი დავაინტერესო და შევასწავლო ეს საქმიანობა. ვგეგმავ ასევე თემატური ხაზის შექმნას, რომელიც გამოკვეთს ჩემი ნამუშევრების ინდივიდუალიზმს“ .