ზოგჯერ ასეც ხდება – ხელოვნების ერთი კონკრეტული მიმართულების ინტერესი სხვა მხრივაც გამოიწვევს ხოლმე ადამიანების მისწრაფებებს – თავი სხვა მხრივაც გამოსცადონ. რაც უფრო მრავალფეროვანია ნამუშევრები, რომლებსაც ესა თუ ის ხელოვანი ქმნის, მათ მიმართ ინტერესი დს მითხოვნაც დიდია. ამასთან, როდესაც ავტორს საკუთარი ხელწერა გამოარჩევს, მისი პროდუქტი კიდევ უფრო მოთხოვნადია.
სუზანა ბადავიძე სამხატვრო სკოლაში სწავლობდა. ხატვის სიყვარულის პარალელურად, მან სხვა არაერთი მიმართულებით გამოამჟღავნა ნიჭი და სურვილი, შეესწავლა და დაემზადებინა სხვადასხვა დანიშნულების თუ სადღესასწაულო ნივთი. დღესდღეობით, მისი საქმიანობა ძალიან მრავალფეროვანია, ნამუშევრების მიმართ მოთხოვნა კი – მზარდი. სუზანა „თბილისი თაიმსს“ ესაუბრა.
ვსწავლობდი სამხატვრო სკოლაში. ბავშვობიდან ძალიან მიყვარს ხატვა და შემდეგ გამიჩნდა სურვილი, სხვადასხვა ხელნაკეთი ჩანთა, საახალწლო სათამაშო და ბევრი სხვა ნივთი დამემზადებინა. თავიდან ჩემთვის გავაკეთე და იმის მერე ბევრი მსურველი გამიჩნდა. მყავს საკმაოდ ბევრი მომხმარებელი და მსურს, უფრო გავაღრმაო ჩემი პროფესია.
სუზანა დეტალურად გვიამბობს, რას ამზადებს. ამასთან, ის ხაზს უსვამს, რომ, უმეტესად, ნამუშევრების შექმნას დღესასწაულების მოახლოებას ამთხვევს.
ხელოვანი ადამიანი ვარ და ყოველთვის მაქვს სურვილი საინტერესო ნივთის შექმნის. გარდა ამისა, ვამთხვევ ნივთების შექმნას დღესასწაულების მოახლოებას. მაქვს კიდევ ჩანთების შეკვეთები, ზოგს სასაჩუქრედ სურს, ზოგს – თავისთვის. საახალწლო ნამუშევრებს ვამზადებ სხვადასხვა გირჩისგან, პენოპლასტისგან. კონუსის ფორმას ვიყენებ ნაძვის ხისთვის და შემდეგ ამ კონუსზე ხდება გირჩების აგება, ხელოვნური და სხვადასხვა დეკორით ვალამაზებ ჩემს იდეას. საახალწლო სათამაშოებსაც ვამზადებ პენოპლასტის ბურთებისგან და შემდეგ ნაჭრით ვფარავ ამ ბურთებს. დიზაინს ვურჩევ მრავალფეროვანი მძივებით და სხვადასხვა დეკორით. ჩანთებს ვქსოვ, ვიყენებ მათთვის ყუთებს და ყუთებისგანაც საინტერესო ჩანთები გამომდის.
როგორც სუზანა აღნიშნავს, იმის გამო, რომ მცირეწლოვანი შვილი ჰყავს, უმეტესად, ნივთებს ღამის პერიოდში ქმნის.
გარდა ამისა, ვზრდი პატარა გოგოს, რომელსაც ვერავის ვუტოვებ. არ მყავს დამხმარე და ხშირად ღამე მიწევს ამ ნამუშევრების შექმნა. ძალიან მამშვიდებს ჩემი პროფესია და კიდევ მეტ სტიმულს მაძლევს ბევრი სხვა ნივთის დასამზადებლად.
