ფერადი, ხალისიანი, გემოვნებიანი – ასეთია სათამაშოები, რომლებსაც თამარ ედიშერაშვილი ქმნის. ეს სასიამოვნო პროცესი მისთვის ჯერ კიდევ 2017 წელს დაიწყო. პირველი წარმატებული ნამუშევრის შემდგომ, რამაც საზოგადოებაში დიდი მოწონება დაიმსახურა, მან მიიღო გადაწყვეტილება, შეექმნა მეტი და ხელმოსაწვდომი გაეხადა სხვებისთვისაც.
თამარი „თბილისი თაიმსს“ საკუთარ პირველ ნაბიჯებზე ესაუბრა.
პირველი თოჯინა 2017 წლის აპრილში მოვქსოვე ეს იყო ცხვარი, რომელიც ყველას მოეწონა და მითხრეს, რომ სხვა რამე ცხოველიც მეცადა. მოვქსოვე რამდენიმე და ყველას მოსწონდა. როდესაც თოჯინენი დაგროვდა, რამდენიმე ჩემმა შვილმა წაიღო თბილისში, ლესელიძეზე არსებულ მაღაზიაში საჩვენებლად და დაიტოვეს – მოეწონათ, გაიყიდა და ახლები შემიკვეთეს. ასე გაგრძელდა…
როგორც თამარი ამბობს, სირთულიდან და ზომიდან გამომდინარე, სათამაშოების შესაქმნელად განსხვავებული დრო სჭირდება. ამასთან, ის იმ მასალის შესახებ საუბრობს, როისგანაც თოჯინებს ქმნის.
ზოგიერთი სათამაშო არის მარტივი, პატარა, თუმცა, არის რთულებიც. ზოგს ერთი დღე სჭირდება დასამზადებლად, ზოგს – 4-5.
სათამაშოებს ვამზადებ ყველა ფირმის, საბავშვო, ანტიალერგიული ძაფისგან. შიგთავსი აქვს სინტიფონი, თვალებად ვიყენებ უსაფრთხო დეტალს.
თუ შეკვეთა არ მაქვს, რასაც მინდა, იმას ვქსოვ. თუ შეკვეთები მაქვს, როგორსაც და რომელსაც შემიკვეთენ, ისეთს ვამზადებ. ზოგი მიგზავნის სურათს და სურათის მიხედვით ვქსოვ.
მანამ, სანამ თოჯინების ქსოვას დაიწყებდა, თამარი ქუდებს ამზადებდა. ახლა კი მხოლოდ სათამაშოების შექმნითაა დაკავებული. გარდა ამისა, უნდა აღინიშნოს, რომ მას საზღვარგარეთიდანაც აქვს ბევრი შეკვეთა. მათ შორის, ბოლო საბერძნეთში გაგზავნა.
