კომპანია “ალტიჰათი” საუკეთესო სერვისებს სთავაზობს მათ, ვისთვისაც თავგადასავლები, სუფთა გარემო, საინტერესო ისტორიები და, უბრალოდ, საოცარი ბუნება ცხოვრების განსაკუთრებული ნაწილია. მისი დაარსების იდეა 2015 წელს გაჩნდა და წინ გარკვეული ისტორია, მიზეზები და მიზნები უძღვის. მისი დამფუძნებლები დავით ჭიჭინაძე, ნიკოლოზ ალავიძე და მამუკა ნიკოლაძე არიან.
რამდენი ხანია, რაც AltiHut-ი არსებობს?
“ალტიჰათის” იდეა 2015 წელს გაჩნდა და ამავე წელს დავიწყეთ მუშაობა. 2016 წლის თებერვალში უკვე კომპანია დავაფუძნეთ სამმა პარტნიორმა. დიდი დრო დაგვჭირდა მიწის ნაკვეთის შესაძენად (დაახლოებით, 1 წელი), 2017 წელს დავასრულეთ პირველი ეტაპი და მოვაწყეთ საძირკველი, ამავე წელს შევუკვეთეთ სახლი შვეიცარიაში და 2018 წლის მაისში მშენებლობა დავასრულეთ. ფუნქციონირებაც ამავე წელს დავიწყეთ და ზაფხულის მიწურულს უკვე პირველი სტუმრებიც მივიღეთ.
როგორია მისი დაარსების ისტორია – რა მიზნით გაჩნდა იდეა?
იდეა 2015 წელს გაჩნდა, ჭაუხებში, სადაც რამდენიმე მეგობარი ოჯახებთან ერთად ვიყავით სალაშქროდ. იქ არსებულმა ანტისანიტარიამ და მოუწესრიგებელმა ინფრასტრუქტურამ მიიპყრო ყველაზე მეტი ყურადღება, რამაც სრულად გადაფარა ლამაზი ბუნების ხედები და ლაშქრობის სიამოვნებაც. ეს ბანალური ფაქტი გახდა კატალიზატორი პროექტის, რომელიც შემდეგ “ალტიჰათში” გადაიზარდა.
ჩვენი პროექტი პრობლემების მოგვარებას დაეფუძნა და ეს თავიდან მხოლოდ ნარჩენების მართვას ეხებოდა, მიზანი ძალიან მარტივი და ბანალური იყო – ნარჩენების მართვის სისტემის აწყობა და ბიოსაპირფარეშოს განთავსება ალპურ სიმაღლეებზე, სადაც უამრავი ტურისტია, თუმცა. არანაირი სანიტარული და უსაფრთხოების პირობა დაცული არაა, არანაირი მართვის ინსტრუმენტი და შეთავაზება უშველებელ ტურისტულ ნაკადს.
საერთაშორისო გამოცდილების სიღრმისეულად შესწავლის შემდეგ კი, პროექტი გავზარდეთ, უკეთ ჩამოვყალიბდით და სრულიად ახალი ეკოსისტემის შექმნა გადავწყვიტეთ, რაც დღეს კავკასიონზე და ზოგადად ჩვენს რეგიონში სრულიად პირველი, წარმატებით განხორციელებული გლობალური განაცხადია.
რა სერვისებს სთავაზობთ საზოგადოებას?
“ალტიჰათი” სათავგადასავლო და მდგრადი ტურიზმის განვითარების ავანგარდშია რეგიონში, მომსახურებას ვთავაზობთ როგორც ინდივიდუალურ. ასევე – კორპორატიულ კლიენტებს, თუმცა, პროექტი ზოგადად ქვეყნის პოზიციონირების გაუმჯობესებას ეხება. სწორედ საერთო ეკოსისტემის ფორმირება და უსაფრთხოების ელემენტარული სისტემების დანერგვა იყო ჩვენი პირველი გამოწვევა, რაც წარმატებით შესრულდა. მომზადდა ვერტმფრენის ასაფრენი ბაქანი, რაც უსაფრთხოების ელემენტარული მოთოვნაა, მობილურ ოპერატორთან თანამშრომლობით, თუმცა, საკუთარი ხარჯებით დავამონტაჟეთ მობილური კავშირისათვის ანტენები (აქტიური და პასიური), რაც კრიტიკულად აუცილებელია კავშირისათვის მთაში და ამ მოვლენით ათეულობით ადამიანის სიცოცხლის გადარჩენა გავხადეთ შესაძლებელი. ასევე, სისტემური მიდგომით სრულად მოვახდინეთ ბრუტალურად დაბინძურებული ე.წ. საბერწეს ტერიტორიის დასუფთავება. ამასთანავე, ინდივიდუალური კომფორტის შექმნით მოვიზიდეთ სრულიად ახალი სეგმენტი საქართველოში, რადგან “ალტიჰათი” განსაკუთრებულ მომსახურებას სთავაზობს აქტიური და სათავგადასავლო დასვენების მსურველებს:
კომფორტული და სუფთა დასვენება, მაღალი ხარისხის საკვები, სრულყოფილი მომსახურება, რასაც ჩეულებრივად, ადვილად მისადგომ და მაღალი ხარისხის სასტუმროში მიიღებს ნებისმიერი სტუმარი (მთის სპეციფიკის გათვალისწინებით), თუმცა, ეს ყველაფერი ზღვის დონიდან 3014 მეტრ სიმაღლეზეა. არ დაგავიწყდეთ, “ალტიჰატში” რომ მოხვდეთ, 6 კმ ფეხით უნდა გაიაროთ და თითქმის 1 ვერტიკალური კილომეტრი სიმაღლე დაფაროთ.
გარდა ამ სერვისებისა, “ალტიჰათში” დაგხვდებათ ევროპაში ყველაზე მაღალ წერტილში მოქმედი ბიბლიოთეკა და საფოსტო ყუთი, საიდანაც ღია ბარათებს დედამიწის ნებისმიერ წერტილში გააგზავნით.
“ალტიჰათში” დასვენება როგორც მსუბუქი ლაშქრობის და აქტიური დასვენების მსურველებს შეუძლიათ, ასევე – პროფესიონალ მთამსვლელებს, ვისაც მყინვარწვერის დაპყრობა აქვს გადაწყვეტილი. “ალტიჰატი” ასევე პოპულარულია სათხილამურო ალპინიზმის (სკიტურის) მოყვარულებში ზამთრის პერიოდში.
როგორია ინტერესი თქვენი შეთავაზებების მიმართ?
ინტერესი მზარდია, ძალიან აქტიურია დასავლეთ ევროპული ქვეყნები, აშშ, ისრაელი. სამწუხაროდ – პანდემიამ და შემდეგ ამ საშინელმა ომმა ხელი შეგვიშალა, თუმცა, ახალი მომსახურებები, რასაც ჩვენ აქტიურად ვნერგავთ, გვაძლევს საშუალებას – რომ სულ ახალი სეგმენტის ტურისტები მოვიზიდოთ, მაგალითად, როგორიცაა „ბერდვჩერები“ იაპონიიდან და ახალი ზელანდიიდან, სკიტურის მოყვარულები საფრანგეთიდან, ავსტრიიდან და შვეიცარიიდან, ალპინისტები ინგლისიდან და ა.შ. “ალტიჰათის” შესახებ შვეიცარიასა და გერმანიაში უფრო მეტი ადამიანი საუბრობს და ამ პროექტს იცნობს, ვიდრე, სამწუხაროდ, ჩვენს ქვეყანაში.
ამ ეტაპზე, რა გეგმები გაქვთ?
ამ ეტაპზე, “ალტიჰათის” მომსახურებას ემოციურად ვაუმჯობესებთ, ასევე – ყოველ წელს ჩვენ თვითონ ვაწყობთ სკიტურის-სკიმოს ჩემპიონატს ჩვენს პარტნიორ კომპანია “თრეილ ლაბთან” ერთად, ვისთან ერთადაც ასევე ყაზბეგის ექსტრემალურ მარათონს ვმასპინძლობთ. ამით კი დამატებით საერთაშორისო ინტერესს ვიწვევთ. 2022 წელს “ალტიჰათის” გუნდი ოფიციალური პარტნიორი გახდა შვეიცარიული კომპანია “ბალის”და მათი გარემოზე ზრუნვის ფონდის – ალის პიკ აუთლუქ“, ვისთან ერთდაც ახალ სამაშველო ქოხის პროექტზე ვმუშაობთ, ზღვის დონიდან 3700-3800 მეტრ სიმაღლეზე. ეს პროექტი სრულიად ახალი განაცხადია სათავგადასავლო და მდგრადი ტურიზმის განვითარებისთვის ჩვენს ქვეყანაში.
