ნამუშევრები, რომლებზეც ამ მასალაში გიამბობთ, 10 წლის გოგონას ეკუთვნის. ბარბარე პაიჭაძე, წინასაახალწლოდ, სხვადასხვა მასალისგან ნაძვის ხეებს ამზადებს. ამ მხრივ თვითნასწავლია. მზადების პროცესი მისთვის სასიამოვნო და საინტერესოა. უფრო დეტალურად, „თბილისი თაიმსს“ ბარბარე თავად ესაუბრა.
„ნაძვის ხეებს ვამზადებ, ძირითადად, საკანცელარიო ნივთებისგან – ფანქრის ნათალების, საქსოვი ძაფის, ფერადი ფურცლების, თექის ბურთულების, ცხელი წებოს და ბრჭყვიალებისგან, დამიმზადებია სიმინდის მარცვლისა და გირჩისგანაც… მსგავსი ვიდეოები ნანახი მქონდა „ტიკტოკ“-ზე. შემდეგ მომივიდა შექმნის იდეა. თან სკოლაში ხელნაკეთი ნაძვის ხეების კონკურსი ტარდებოდა. მივიღე მონაწილეობა და დავიმსახურე ესთეტიკის კათედრის სიმპატია. მთავარია, შესაქმნელად მასალა მქონდეს. სირთულეს საერთოდ არ წარმოადგენს, ჩემთვის სახალისოც კია“.
როგორც ბარბარე ამბობს, მისი ნამუშევრების მიმართ საზოგადოების ინტერესი თავიდანვე დიდი იყო. გარდა ნაძვის ხეებისა, ის ამზადებს სამკაულებსა და სხვადასხვა ნივთს, თუმცა, ისინი ჯერ არ გაუყიდია.
„ჩემი ნამუშევრების მიმართ საზოგადოების ინტერესი დიდი და დადებითია. ყველას ძალიან მოეწონა, რამაც ძალიან გამახარა და გამაბედნიერა. წარმატებებს მისურვებენ, მაქებენ, დამზადებას მთხოვენ. ხელსაქმე ძალიან მიყვარს, ვაკეთებ სამკაულებს, მიყვარს კრეატიული და ახალი ნივთების შექმნა. გაყიდვაზე ჯერ არ მიფიქრია, მაგრამ, საზოგადოების დიდი ინტერესისა და მოწონების გათვალისწინებით, სამომავლოდ ვფიქრობ, ჩემ მიერ შექმნილი სამკაულები და ნივთები გავყიდო. გარდა ხელსაქმისა, ვხატავ, ვცეკვავ ანსამბლ „თოლიგე“-ში, მაქვს 100-ზე მეტი წიგნი წაკითხული“.
