სუნევირის შერჩევისას ჩვენ სხვადასხვა დეტალს ვითვალისწინებთ. საბოლოოდ, გვინდა, ის იყოს პოზიტიური, სამახსოვრო და სასიამოვნო განწყობას ქმნიდეს. სწორედ ასეთ პროდუქტს სთავაზობს მომხმარებელს „დაფიონა“. არცთუ ისე დიდი ხანია, რაც ის ქართულ ბაზარზეა. ფერადი და ხალისიანი, ხის დაფებით ის საზოგადოებაში კარგ განწყონას ქმნის. „თბილისი თაიმსს“ მარიამ სერგია ესაუბრა.
„დაფიონა“ 2020 წლიდან არსებობს. მოგეხსენებათ, პანდემიის პერიოდი, გარდა სირთულეებისა, ბევრი ადამიანისთვის აღმოჩნდა ერთგვარი გამოწვევა სხვადასხვა მიმართულებით. მეც ერთ-ერთი მათგანი ვარ. ყველასთვის ასეთ რთულ და ნეგატიური განწყობით სავსე პერიოდში, გაჩნდა იდეა, რომ მეცადა, სახლში მყოფი ადამიანების განწყობა გამეხალისებინა. პირველ ყოვლისა, ამ ადამიანებში ჩემი ოჯახის წევრებს მოვიაზრებდი. თავიდან დავიწყე თაფლის ქილების სხვადასხვა სახალისო ანიმაციებით მოხატვა და შემდეგ უკვე მოვიდა იდეა, დახატვა ხის მასალაზეც მეცადა. რამდენიმე საცდელი ვერსია სახლში არსებულ ხის საყოფაცხოვრებო ნივთებზე ვცადე და შემდეგ უკვე კონკრეტულ დაფებზე დავიწყე მუშაობა. რაც შეეხება სახელწოდება ,,დაფიონას“ – თავიდან, როცა სახელზე ვფიქრობდი, მინდოდა, ეს ყოფილიყო ისეთი სიტყვა, რაც დაუკავშირდებოდა დაფასაც და ფერადოვნებასაც. სწორედ ასე შეირჩა სიტყვა დაფიონა, რომელიც სულხან – საბას განმარტებით, ნიშნავს – ,,ცათ ფერად ფერადად ელვარობა“.
როგორც მარიამი ამბობს, ის ცდილობს, ნამუშევრებს თან ახლდეს იუმორი პოსტების ან ვიდეორგოლების სახით.
„ვთანაშმრომლობ იმერეთის ერთ-ერთ სოფელში მცხოვრებ დურგალთან, ჩამომაქვს სამზარეულოს ხის დაფები და ამ დაფებზე ხელით ვხატავ ანიმაციურ პერსონაჟებს. საქართველოში მსგავს პროდუქციას რამდენიმე მეწარმე ქმნის, ყველა მათგანის შრომა ნამდვილად დასაფასებელია. ჩემი მხრივ, მე ვცდილობ, ,,დაფიონებში“ მკვეთრად იყოს გამოხატული ფერადი და სახალისო განწყობა და ამ ყველაფერს თან ახლდეს იუმორი – პოსტების ან ვიდეორგოლების სახით“.
„თბილისი თაიმსთან“, მარიამი „დაფიონას“ სამომავლო გეგმებზეც საუბრობს და აღნიშნავს, რომ სამზარეულოს აქსესუარების შეთავაზებასაც გეგმავს.
„სურვილი მაქვს, ,,დაფიონას“ კოლექციას შევმატო ხის მოხატული სამზარეულოს აქსესუარები და სამომავლოდ ვფიქრობ, ამ მიმართულებითაც დავიწყო მუშაობა“.
