Flowers & More – ეს იმ ხორცშესხმული იდეის სახელწოდებაა, რომელიც ორ ადამიანს, რუსიკო მიქავასა და ხათუნა კალატოზიშვილს ეკუთვნის. საქმიანობა, რომელსაც ისინი უდგანან სათავეში, ჯერ მხოლოდ ოთხი თვისაა და ითვალისწინებს ხარისხიანი, მოთხოვნადი ყვავილების წარმოებას და რეალიზაციას, რაზეც დეტალურად, „თბილისი თაიმსს“ ესაუბრნენ.
რა ტერიტორიას მოიცავთ?
ჩვენ მიერ ათვისებული საწარმოო ფართობი მოიცავს 3000 კვ.მ-ს, რომელიც თავის მხრივ მოიცავს სამ საწარმოო ნაგებობას – თითოეული 800 კვ.მეტრი ფართობით, საიდანაც ორი წარმოადგენს სათბურს და ერთი – ღია სივრცეს, რომელიც დაცულია სეტყვისგან.
რატომ გადაწყვიტეთ კონკრეტულად ამ მიმართულებით საქმიანობა?
ჩვენთვის ძირითადი მამოძრავებელი იყო ის საოცრად სასიამოვნო პროცესი, რასაც თესვის, აღმოცენების, ზრდის, ნაყოფის მიღების და ფორმირების პროცესი ჰქვია. მამოძრავებელია მიწასთან მუშაობის ხიბლი და ის სილამაზეც, რაც შედეგად მიიღება. ასევე, ხარისხიანი პროდუქტის მწარმოებლების იმიჯის შექმნა.
საქმიანობა ჯერ ახალი დაწყებული გაქვთ – ამ დრომდე, შედეგს როგორ შეაფასებთ?
იქიდან გამომდინარე, რომ სწორება გვაქვს ხარისხიან პროდუქტზე, ვართ დამწყებები და, ფაქტობრივად, მიმდინარეობს პარალელური სწავლის პროცესი. ჩვენ თავს არ ვაძლევთ ე.წ. კმაყოფილების უფლებას. თუმცა, მყიდველების შეფასება, მნახველების რეაქციები ძალიან გვაბედნიერებს და ჩვენი შედეგებიც გვეამაყება. რა თქმა უნდა, ვფიქრობთ, რომ სამომავლოდ უკეთესი შედეგი უნდა მივიღოთ.
თუ გეგმავთ, ასე ვთქვათ, გაფართოებას?
სამომავლოდ გაფართოებას ვგეგმავთ, რა თქმა უნდა, იქედან გამომდინარე – რა შესაძლებლობებიც გვექნება. თუმცა, უპირველესი პრიორიტეტია სუფთა გარემოს შექმნა მზის პანელების გამოყენებით, რაც საკმაოდ დიდი ინვესტიციაა და იდეაში კაპიტალური დაბანდების კუთხით, შეიძლება ითქვას, ჩვენი პროგრამა მაქსიმუმია და რასაც, ცხადია, მხოლოდ საკუთარი ძალებით ვერ გავწვდებით.
უფრო მოკლევადიან ვადაზე ვგეგმავთ მოცულობის მიღწევას ხარისხის გაუმჯობესების და მცენარის სიცოცხლისუნარიანობის გაზრდის საშუალებით, დასაქმებულთა კვალიფიკაცის აწევის საშუალებითაც, მათ შორის.
ჯერ ზუსტად არ ვიცით, გარემო პირობები, რომლებიც დღეს ძალიან ცვალებადი (ფასები), რთულად პროგნოზირებადი (ქარი, ნესტი, სიცხე) და ბევრ საკითხში ხელშემშლელიცაა (არაჯანსაღი კონკურენცია, ენერგომატარებლებზე მაღალი ტარიფები და ა.შ.), როგორ გავლენას მოახდენს ჩვენს საქმიანობაზე.
