ნებისმიერი საქმის წარმატებას მის მიმართ სიყვარული განაპირობებს. უნარებისა და მიდრეკილებების სწორად წარმართვის შემთხვევაში, საყვარელი საქმიანობა პიროვნების ყოველდღიურობა ხდება და ცხოვრება ასე გაცილებით საინტერესოა. თამარ ქაჯაია ერთერთი გამორჩეული, ქართული ბიზნესის დამფუძნებელია, რომელსაც „ტილისკვერი“ (მეგრულად, „ტკბილი კვერი“) ჰქვია. ის ჩვენთვის გამორჩეული პროდუქტის – ტყლაპის ძალიან საინტერესო, გემრიელ და მრავალფეროვან ვერსიებს ქმნის. მესამე წელია, აღნიშნული საქმიანობით არის დაკავებული, რაც ბევრ სირთულესა და შრომასთან არის დაკავშირებული. „თბილისი თაიმსს“ თამარი ესაუბრა.
„ვამზადებ ტყლაპს ყველანაირი ხილით, რითაც კი შესაძლებელია – გამონაკლისია თუთა. არ ვიყენებ ფერებსა და არომატიზატორებს. არის ზოგიერთი ხილი, რომელსაც ცოტა შაქარი სჭირდება – იშვიათ შემთხვევებში, მასაც ვიყენებ. ჩვენ მიერ დამზადებული პროდუქტი არის ჯანსაღი, ნატურალური. მის მიმართ ინტერესი ყოველდღიურად მზარდია. მომხმარებელთა შორის ბევრი ემიგრანტია, არიან დიაბეტით დაავადებულებოც. ამ ეტაპზე, ვმუშაობთ ონლაინ და მთელს საქართველოს მოვიცავთ“.
როგორც თამარი ამბობს, „აწარმოე საქართველოშის“ ფარგლებში, შარშან გრანტი მოიპოვა, რისი საშუალებითაც შეიძინა წვრილმანები და მნიშვნელოვანი დანადგარები – თუ იქამდე მცირე ზომის აპარატებს იყენებდა, მოპოვებული გრანტის მეშვეობით, დიდი ზომის დანადგარები შეიძინა.
როგორც მან აღნიშნა, არ გეგმავს, რომ სხვა პროდუქტიც შესთავაზოს მომხმარებელს, რადგან ტყლაპის დამზადება დიდ დროსა და ენერგიას მოითხოვს.
„ტყლაპის დამზადება, ჩირებთან შედარებით, რთული და დრომატევადი პროცესია. მყავს ერთი დამხმარე, ხელს მიწყობენ ოჯახის წევრები. მაქვს რამდენიმე მაცივარი, რომელსაც სეზონური ხილისთვის ვიყენებ. ტყლაპებს ვუმატებთ სეზამის მარცვლებს, თხილეულს, გოგრის თესლს მათთვის, ვინც არ არის ალერგიული. ამით გამოირჩევა ჩვენი ნაწარმი. საინტერესოა ჩვენ მიერ დამზადებული „ტყლაპის წიგნი“ – ტყლაპების ნაკრები.
თამარმა ამ მხრივ ქვეყანაში არსებული კონკურენციაც შეაფასა.
„ტყლაპის მზადების პროცესი იმდენად რთულია, რომ ბევრი იწყებს, თუმცა, უმეტესობა ისევ ჩირებზე გადადის. მხოლოდ ტყლაპს, ასე სსვადასხვა შეფუთვითა და ფართო ასორტიმენტით, არ შემხვედრია, რომ ვინმე კოდევ ამზადებდეს“.
