ვინ არიან „ბავშვთა პორნოგრაფიის“ ქართველი ფიგურანტები

რამდენიმე წლის წინ შეერთებული შტატების მიგრაციის სამსახურმა სხვადასხვა დანაშაულში ეჭვმიტანილი მიგრანტების წინააღმდეგ ჩაატარა სპეცოპერაცია, სახელწოდებით „ჯვარედინი შემოწმება“, რომლის ფარგლებშიც 2059 მიგრანტი დააკავეს. მათ ბრალი დასდეს სხვადასხვა დანაშაულებში, მათ შორის საბავშვო პორნოგრაფიაში.

აღნიშნული სპეცოპერაცია, სხვა შტატებთან ერთად, სამხრეთ დაკოტაშიც ჩატარდა. სპეცოპერაციიდან დაახლოებით ერთ თვეში ცნობილი გახდა, რომ არასრულწლოვანთა პორნოგრაფიით ვაჭრობაში ამერიკაში მცხოვრები კარატეს ქართველი ინსტრუქტორი, ალექსანდრე სუმბაძეც იმხილება.

მერილენდის შტატის პოლიციამ სწორედ სამხრეთ დაკოტას გამომძიებლისგან მიიღო ინფორმაცია, რომ მონტგომერში გაურკვეველი პირი ბავშვთა პორნოგრაფიას ინტერნეტში ავრცელებდა.

პოლიციის ცნობით, სუმბაძე, კარატეს დარბაზში, მოზარდებთან სექსუალურ კავშირს ამყარებდა და ფაქტს ვიდეოზე იღებდა.

ვინ არის ალექსანდრე სუმბაძე?

სამართალდამცველების ინფორმაციით, სუმბაძე ბეტესდაში ცხოვრობდა. ის ბავშვობიდან ეუფლებოდა საბრძოლო ხელოვნებას. 2011 წელს ინსტრუქტორი გახდა, მოგვიანებით კი ბიზნესის წილის მფლობელი.

ალექსანდრე სუმბაძის გვერდზე სოციალურ ქსელ linkedinში წერია, რომ მან მერილენდის უნივერსიტეტი დაამთავრა და Mat Sports International-ში მუშაობდა.

მამამისი, დავით სუმბაძე დიპლომატია. ის 1996-დან 2006 წლამდე აშშ-ში საქართველოს დიპლომატიურ მისიაში საქმიანობდა, ამჟამად კი საერთაშორისო კვლევითი ორგანიზაციის თანამშრომელია.

სუმბაძეების ოჯახი უკვე წლებია, შეერთებულ შტატებში ცხოვრობს, თუმცა ახლა სად იმყოფება პორნოგრაფიით ვაჭრობაში მხილებული ალექსანდრე სუმბაძე, უცნობია.

საკმაოდ წარმატებული აღმოჩნდა ამერიკელი და ქართველი სამართალდამცველების თანამშრომლობა 2014 წელს, როდესაც არასრულწლოვნის პორნომასალის დამზადება-გავრცელების ფაქტი გახდა ცნობილი.

მაშინ საქართველოს ინტერპოლის ბიუროს აშშ-ს საელჩოს უსაფრთხოების დეპარტამენტი დაუკავშირდა და სხვადასხვა პორნოსაიტებზე არასრულწლოვანი გოგონას პორნოგრაფიული ვიდეოები და ფოტოები აჩვენა. გამომდინარე იქიდან, რომ გოგონა კავკასიური აღნაგობის გახლდათ, ამერიკული მხარე ვარაუდობდა, რომ ის შესაძლოა, ქართველი ყოფილიყო.

სწორედ ამ მიზნით მოხდა საქმეში ქართველი სამართალდამცველების ჩართვა და როგორც გაირკვა, არცთუ უსაფუძვლოდ. არასრულწლოვნის იდენტიფიცირების შედეგად დადგინდა, რომ ის ნამდვილად საქართველოს მოქალაქე იყო, სექსუალური ხასიათის ფოტო და ვიდეოგადაღება კი თბილისის ერთ-ერთ სასტუმროში წარმოებდა.

რამდენად და სად იყიდებოდა ქართველი გოგონას პორნოვიდეოები?

როგორ დაუკავშირდნენ ერთმანეთს დანაშაულში ეჭვმიტანილი საქართველოსა და ისრაელის მოქალაქეები?

ირკვევა, რომ ამ საქმეში ერთდროულად იყვნენ ჩართულნი საქართველოს, აშშ-ს, ავსტრალიისა და ისრაელის სპეცსამსახურები. ქართველი გოგონას პორნოსურათები ინტერნეტსივრცეში იტვირთებოდა „აიპი“ მისამართიდან, რომელიც ისრაელში გახლდათ რეგისტრირებული. საბოლოოდ გაირკვა, რომ ამ ბავშვის ექსპლუატაციას ეწეოდა საკუთარი დედა, რომელიც არასრულწლოვან შვილს თავადვე უღებდა პორნოსურათებს. ფაქტობრივად, მასალის 80 პროცენტი მშობლის მიერ იყო გადაღებული, თუმცა არაერთხელ მონაწილეობდა ამ საქმეში ისრაელის მოქალაქეც, რომელიც პერიოდულად ჩამოდიოდა ხოლმე საქართველოში.

ეს დანაშაული სათავეს იღებს 2011 წლიდან, ანუ გოგონა სექსუალური ექსპლუატაციის ქვეშ 9 წლიდან იმყოფებოდა. საკუთარი შვილის სექსუალურ ექსპლუატაციაში მხილებული დედის შემოსავალი თვეში 100-დან 200 დოლარამდე მერყეობდა, რომელსაც ებრაელი მას უგზავნიდა. თავად ეს მამაკაცი რამდენს იღებდა, ზუსტად არ არის დადგენილი, მაგრამ, პოლიციის ვარაუდით, ერთ ასეთ ფოტოს დაახლოებით 50 დოლარად ყიდდა, ვიდეოებს – უფრო ძვირად.

რა ბედი ეწია დაზარალებულ არასრულწლოვანს?

როგორც ცნობილია, ის გარკვეული ხნით ტრეფიკინგის მსხვერპლთა თავშესაფარში გადაიყვანეს, შემდეგ საცხოვრებლად დეიდასთან გადავიდა და პატიმრობაში მყოფ დედასთან არავითარი შეხება აღარ აქვს.

„თავად გოგონამ გამოთქვა სურვილი დეიდასთან ცხოვრების. ჩვენ მივაწოდეთ ინფორმაცია სოციალური მომსახურების სააგენტოს, რომელმაც დეიდის ოჯახი შეისწავლა და შეაფასა, ამის შემდეგ მას დეიდა დაენიშნა მეურვედ, ცხოვრობს მასთან და ბებიასთან ერთად, ეტაპობრივად ხდება მონიტორინგი. თავს კარგად გრძნობს, დეიდაც თავად გვეკონტაქტება კონსულტაციის თვალსაზრისით“, – განგვიმარტეს თავშესაფარში.

პორნოგრაფიის კიდევ ერთი სკანდალური საქმე ასევე ქართველი და უცხოელი სამართალდამცველების აქტიური თანამშრომლობით მიმდინარე წლის დასაწყისში გაიხსნა, რა დროსაც სისხლის სამართლის პასუხისგებაში 24 ადამიანი მისცეს, მათ შორის არასრულწლოვნების ოჯახის წევრები.

ბავშვთა პორნოგრაფიაში ჩართული 12 წლის გოგონა ჰყვება, თუ როგორ უღებდა მას ამერიკელი ფოტოგრაფი კარლ უილიამსი ეროტიკულ ფოტოებს.

მისი თქმით, ის ამ ყველაფერს პროკურატურას უმალავდა და მას ეროტიკული ფოტოები მინიმუმ ათჯერ გადაუღეს.