ხშირად ხდება, რომ სანამ პიროვნება თავად გაერკვევა საკუთარ უნარებში, ამას სხვები ხედავენ – უმეტესად, მშობლები. ასე მოხდა მათე ზარნაძის შემთხვევაში. ვიდრე ის საკუთარ შესაძლებლობებს შეაფასებდა, ხატვისა და ლამაზად წერის გამორჩეული ნიჭი სწორედ მისმა მშობლებმა დაინახეს. ეტაპობრივად, მათემ არაერთი ნაბიჯი გადადგა იმისთვის, რომ ყოფილიყო მისი თაობის ერთერთი გამორჩეული კალიგრაფი. არაერთი წარმატებისა და აქტივობის კვალდაკვალ, ის ლამაზად წერის სამყაროსთან მჭიდროდ არის დაკავშორებული. მათე „თბილისი თაიმსს“ ესაუბრა.
რამ განაპირობა თქვენი ინტერესი კალიგრაფიის მიმართ?
პატარაობიდან ძალიან მიყვარს და მაინტერესებს ხატვა. როდესაც გავხდი სკოლის მოსწავლე, ჩემმა მშობლებმა აღმოაჩინეს, რომ მქონდა ხატვის და ლამაზად წერის ნიჭი. როდესაც ვიყავი 9 წლის, ძალიან მინდოდა, განმევითარებინა სამხატვრო ხელოვნება და, მშობლების რჩევით, მივედით რუსთავის სიონთან არსებულ სამრევლო სკოლა ,,მთაწმიდელში” , სადაც, ხატვის წრის გარდა, არის მრავალი მიმართულება, მათ შორის, კალიგრაფიის წრე. დედაჩემის რჩევით და თხოვნით, ხატვის შესარჩევ გამოცდასთან ერთად, ასევე მივიღე მონაწილეობა, კალიგრაფიის შესარჩევ პრაქტიკულ გამოცდაზე. უფლის ნებით მოხდა ისე, რომ კალიგრაფიის წრეზე ჩავირიცხე, ხატვის წრეზე კი რეზერვში მოვხვდი. ცოტა გული კი დამწყდა, ასე რომ მოხდა, მაგრამ სულ ცოტახანში ჩემმა საოცარმა და უნიჭიერესმა მასწავლებელმა, დავით მაისურაძემ ისე დამაინტერესა და შემაყვარა კალიგრაფიის ჯადოსნური სამყარო, რომ ახლა ვეღარც კი ვარჩევ, რომელი უფრო მეტად მიყვარს.
პირველი კურსის დასასრულ, ჩატარდა კონკურსი კალიგრაფიაში, ქვემო ქართლის მასშტაბით. სადაც მე-2 და მე-4 კლასებს შორის გავხდი პირველი ადგილის მფლობელი, რამაც ძალიან გამახარა, უფრო მეტი მოტივაცია მომცა და მეტი დაინტერესება გამოიწვია ქართული კალიგრაფიის მიმართ.
ამ მხრივ, ცოდნა რა მეთოდებით მიიღეთ?
კალიგრაფიის ცოდნა, პირველ ყოვლისა, მივიღე ჩემი უნიჭიერესი მასწავლებლისგან, დავით მაისურაძისგან. სამი წლის მანძილზე, მან ძალიან ბევრი რამ შემასწავლა. ასევე, ვესწრებოდი პროფესიონალ, კალიგრაფების ნამუშევრების გამოფენებს, დავდიოდი ხელნაწერთა ეროვნულ ცენტრში, სადაც გავეცანი ძველი ხელნაწერების მრავალსაუკუნოვან ისტორიას და შევისწავლე ბევრი საინტერესო ტექნიკური დეტალი. ასევე, ბოლო ერთი წელია, ჩემი ნამუშევრებით დაინტერესებულმა ადამიანებმა შემიკვეთეს მათთვის სასურველი ნამუშევრების შექმნა, რამაც ძალიან დიდი გამოცდილება და ცოდნა შემაძენინა. არ შემიძლია, არ ვახსენო ჩემი პირველი შემკვეთი, სალომე ელიაშვილი, რომელმაც ძალიან დიდი სტიმული მომცა და კიდევ უფრო შემაყვარა ქართული კალიგრაფიის ჯადოსნური ხელოვნება.
დღესდღეობით, ამ მიმართულებით, რას საქმიანობთ?
დღესდღეობით, კალიგრაფიის კურსზე სიარულს სამწუხაროდ დროის სიმცირის გამო ვეღარ ვახერხებ. მაგრამ ჩემ ირგვლივ არიან ისეთი ადამიანები, ვინც იცნობს ჩემს შემოქმედებას და მათი ხელშეწყობით ბოლო ორი თვის განმავლობაში განვახორციელე ორი ფართომასშტაბიანი პროექტი. ჩემი სკოლის, რუსთავის ჟიული შარტავას სახ.მე-4 საჯარო სკოლის დირექტორის, ბატონ მამუკა ხამხაძის შემოთავაზებით, მოვხატე ქართული ანბანი სამივე დამწერლობით, რომელიც დარჩება ჩემს სკოლას. ასევე, რუსთავში არსებულ ფოტოსტუდიას – ,,სამაილ სტუდიოს” მოვუწერე წიგნი, რომლის მასშტაბიც არის 170×200. ეს ორი პროექტი იყო ჩემთვის განსაკუთრებით მნიშვნელოვანი და საინტერესო.
ამ ეტაპამდე, რომელ წარმატებას გამოარჩევთ?
ჩემი წარმატებებიდან ყველა იყო განსაკუთრებული და საინტერესო, მაგრამ ყველაზე გამორჩეული იყო 2022 წელს საქართველოს კალიგრაფთა ასოციაციის მიერ ჩატარებული კონკურსი – ,,თბილისი 900”, რომელშიც 18 წლამდე ასაკის კატეგორიაში გავხდი კონკურსის გამარჯვებული და კალიგრაფ გიორგი სისაურის რჩეული. მან დამაჯილდოვა თავისი საავტორო კალიგრაფიის უფასო კურსით, რამაც ძალიან გამაბედნიერა, რადგან ჩემი დიდი ოცნება იყო, შემესწავლა მისი საოცარი ტექნიკა.
გარდა კალიგრაფიისა, რა ინტერესები გაქვთ?
კალიგრაფიის გარდა, დაინტერესებული ვარ პორტრეტების ხატვით (ნახშირით). ასევე, სპორტით, კერძოდ, ფრენბურთით და ფიზიკური ვარჯიშით.