შოვში, მეწყერში მოყოლილი დავით ჯელაძე, რომელმაც 6 წლის დისშვილი ღვარცოფის მოტანილი ლაფიდან გადაარჩინა მმართველი პარტიის თავმჯდომარეს, ირაკლი კობახიძეს მიმართავს. როგორ გამოჰყავდა ჯელაძეს მცირეწლოვანი დისშვილი, ამის ამსახველი ვიდეოები 3 აგვისტოს გავრცელდა.
“ვაიმეე, ამას რას მოვუსმინე, ეს რა თქვი?!” – წერს დავით ჯელაძე “ფეისბუკში” გამოქვეყნებულ სტატუსში, რომელშიც ირაკლი კობახიძეა მონიშნული.
შოვში მომხდარი სტიქიიდან მე-11 დღეს მმართველი პარტიის ოფისში ბრიფინგი გამართა ირაკლი კობახიძემ და ჟურნალისტების კითხვებს უპასუხა. მისი ნათქვამის მიხედვით, 3 აგვისტოს “ვისაც მისწვდა ღვარცოფული მასა, გადარჩენის შანსი უბრალოდ არ ჰქონდათ”.
“იყო ასევე სპეკულაციები, არასწორი ინფორმაცია ვრცელდებოდა იმასთან დაკავშირებით, რომ თითქოს ერთ-ერთი ბავშვი 3 საათი ებრძოდა ღვარცოფს, რაც არის წარმოუდგენელი ტყუილი. შეუძლებელია ასე განვითარებულიყო იქ პროცესი. კიდევ ერთხელ გავიმეორებ, სტიქია იყო მყისიერი… საუბარი იმაზე, რომ ვიღაც 3 საათი ებრძოდა სტიქიას, უბრალოდ არის ცარიელი ტყუილი”, – თქვა კობახიძემ.
ჟურნალისტების კითხვის საპასუხოდ კი მან დავით ჯელაძის შესახებაც ისაუბრა.
“მე ვერ გეტყვით ამ ფოტოზე, გადავამოწმებ არ ვიცი. რატომ იყო საჭირო ერთი ნაპირიდან მეორეზე გადასვლა ეს არ ვიცი, იმიტომ, რომ, რა თქმა უნდა, უფრო უსაფრთხო იყო იმ ნაპირზე დარჩენა, იქ ბევრი ადამიანი დარჩა. ჩვენ ვიყავით მეორე დღეს მაგ ტერიტორიაზე და იქ გადასვლა იყო პრაქტიკულად წარმოუდგენელი, ამიტომ გადასამოწმებელია ეს ყველაფერი, არ ვიცი, მე უბრალოდ ვერ გეტყვით მაგასთან დაკავშირებით”, – თქვა მან.
