ბათუმში, ზღვაში სკუტერის დაჯახების შედეგად გარდაცვლილი 22 წლის ბიჭი მიშო ჯალაბაძეა. ამის შესახებ ინფორმაციას ტელეკომპანია „თრიალეთი“ ავრცელებს. მათი ცნობით, ახალგაზრდა გორის მუნიციპალიტეტში, სოფელ ქორდში ცხოვრობდა.
ექიმების ინფორმაციით, ახალგაზრდა მამაკაცს თავის არეში მძიმე დაზიანება ჰქონდა მიღებული და მისი გადარჩენა ვერ მოხერხდა.
არსებული ინფორმაციით, 22 წლის ბიჭი მეგობართან ერთად ზღვაში სკუტერით შევიდა. ახალგაზრდა მამაკაცი ზღვაში ცურავდა, რა დროსაც აღნიშნული სკუტერი დაეჯახა და მძიმედ დაშავდა. გავრცელებული ცნობით, სკუტერს მეგობარი მართავდა.
მომხდართან დაკავშირებით გამოძიება სისხლის სამართლის კოდექსის 275-ე მუხლით დაიწყო, რაც რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
