სამოქალაქო აქტივისტი არჩიბალდ მეკეში პოლიტიკურ პარტიას ქმნის და 2024 წლის საპარლამენტო არჩევნებში მონაწილეობას გეგმავს. მისი თქმით, პარტია სოციალ-დემოკრატიულ იდეოლოგიაზე იქნება დაფუძნებული და რეალური პრობლემების მოგვარებაზე იმუშავებს. ამის თაობაზე მან ბლოგერ გიორგი კვარაცხელიასთვის მიცემულ ინტერვიუში ისაუბრა.
„ჩემმა მეგობარმა ქუჯიმ მითხრა: „შენ ცდილობ, მიხვიდე სხვა ადამიანებთან, საკუთარი თავი ჩაბერო მათში და ეუბნები, რომ თავად გეზარება პოლიტიკა და იქნებ მან გააკეთოსო; ტყუილად ეძებ მაგ გმირს, ეგ გმირი შენ თვითონ ხარო“. ეს სიტყვები ჩამრჩა, მივხვდი, რომ ჩემი გასაკეთებელია…
უბედნიერესი ვიქნები, რომ 2024 წლამდე შევძლო საკუთარი საქმიანობის გარშემო ბევრი ადამიანის გაერთიანება და ამის პარტიად ჩამოყალიბება. ერთის მხრივ, ეს აქტივისტური საქმიანობა ცნობიერების გაზრდის კუთხით ძალიან მნიშვნელოვანია, მაგრამ თუ ეს 30-წლიანი სისტემა არ ჩანაცვლდა ახალი პოლიტიკური ძალებით, მუდმივად ვიქნებით კანალიზაციით გაბერილ სისტემაზე სანტავიკების დაკვრის რეჟიმში.
მთავარია, ქვეყანაში გაჩნდეს დიდი სოციალ-დემოკრატიული პარტია ნოე ჟორდანიას იდეალებით.
დიდი იმედი მაქვს, რომ 2024 წლის არჩევნებში მივიღებ მონაწილეობას. NGO-სისტემა, სამთავრობო ხელისუფლება, მათთან აფილირებული ძალები, ოპოზიცია და მათთან აფილირებული ძალები, ერთად ქმნიან კოლონიურ დღის წესრიგს და არც ერთი მათგანი არ არის დაინტერესებული რეალური საკითხების მოგვარებით, სათოფეზე არ უნდა გაიკარო არავინ…
პარადოქსია, რომ საქართველოში მოსახლეობის აბსოლუტური უმრავლესობა არის მარგინალიზებული და მათ არ გააჩნიათ საკუთარი ხმა პოლიტიკურ მეინსტრიმში. როცა ნათლად დავინახე ეს სისტემა, ეს იყო გადამწყვეტი და ვთქვი, რომ შემიძლია გადავდო თავი ამისთვის. ვწვალობ, გავალ ბოლომდე, დედას ვუტირებ ყველას“, – აცხადებს არჩიბალდ მეკეში.
