უკრაინული მედიის ინფორმაციით, ოკუპირებული ლუგანსკის ოლქის ტერიტორიაზე ე.წ. ლუგანსკის სახალხო რესპუბლიკის საბაჟო სამსახურის ხელმძღვანელი, იური აფანასევსკი ააფეთქეს. უკრაინის უსაფრთხოების სამსახურიდან წყაროზე დაყრდნობით, მედია წერს, რომ აფანასევსკი საკუთარ სახლში ააფეთქეს და მას მრავლობითი ჭრილობები თავის, კისრის და მუცლის არეში აქვს მიღებული და მძიმე მდგომარეობაში, რეანიმაციაში იმყოფება.
უკრაინული მედია წყაროებზე დაყრდნობით აცხადებს, რომ აფეთქება უკრაინის უსაფრთხოების სამსახურის ოპერაცია იყო.
აფანასევსკი გენერალ-მაიორი და FSB-ის ცენტრალური აპარატის აგენტია, რომელმაც მედიის ცნობითვე, უკრაინის წინააღმდეგ მებრძოლი ფორმირებების დასაფინანსებლად ფული “გაათეთრა”. ის სანქცირებულია ევროკავშირის, დიდი ბრიტანეთის, კანადის, შვეიცარიისა და იაპონიის მიერ.
რუსული მედიის ინფორმაციით კი, აფეთქების შედეგად აფანასევსკის ვაჟი დაშავდა, “საბაჟოს ხელმძღვანელს” კი სერიოზული დაზიანებები არ მიუღია – „საავადმყოფოში მისი შვილია და არა ის. მაგრამ თავდასხმა, სავარაუდოდ, იყო მიმართული კონკრეტულად აფანასევსკის წინააღმდეგ, ”- წერს TASS.
ოფიციალური ინფორმაცია ჯერჯერობით არც ერთ მხარეს არ გაუვრცელებია.
