ხელოვნება, ლამაზი და ხელნაკეთი ნივთები თითქმის ყველას გვიყვარს. თუმცა, ყველას არ გააჩნია შესაბამისი უნარები და სურვილი, დაამზადოს ისინი და პროცესით სიამოვნება მიიღოს. მათთვის კი, ვინც საკუთარი ხელებით ქმნის გამორჩეულ ნამუშევრებს, მზადების ყველა ეტაპი დროის სასიამოვნოდ გატარების საუკეთესო საშუალებაა.
ლევან გელოვნიშვილი მხატვრულ კერამიკაზე მუშაობს. მისი მამა კერამიკოსი გახლავთ. როგორც ის გვიყვება, 90-იან წლებში სრულიად შემთხვევით მოხვდა კერამიკოსთა შეკრებაზე. ეს ადამიანები მამამისის მეგობრები იყვნენ. შემდგომ ის თავადაც დაინტერესდა აღნიშნული ხელსაქმით და ჩაერთო პროცესში.
ლევანი „თბილისი თაიმსს“ უყვება, როგორია ამ სფეროს მიმართ, მათ შორის, ახალგაზრდობის ინტერესი.
ამ მხრივ, ახალგაზრდების ინტერესი ძალიან დიდია. მყავს მოსწავლეები – ეს გახლავთ მომავალი თაობა, რომელიც დაინტერესებულია კერამიკით. დღესდღეობით ძალიან ბევრი სახელოსნოც იხსნება საქართველოში. ამ მიმართულებით წინსვლაა. ეს ძალიან კარგია, რა თქმა უნდა – სფერო უფრო განვითარდება და ჩვენ, კერამიკოსები ჩვენს სიტყვას ვიტყვით.
ხელოვანი აღნიშნავს, რომ კერამიკოსებს სახელმწიფოს მხრიდან აქვთ ხელშეწყობა. ისინი „აწარმოე საქართველოს“ პროექტებში იღებენ მონაწილეობას, ძალიან ბევრმა მიიღო დაფინანსება და შეიძინა შესაბამისი ინვენტარი.
დიზაინსა და ნამუშევრების მრავალფეროვნებაზე საუბრისას, ლევან გელოვნიშვილმა აღნიშნა, რომ ამზადებს ყველაფერს, რასაც დამკვეთი ისურვებს. ის ქმნის ნებისმიერ ნაწარმს, იქნება ეს სასაჩუქრე თუ სხვა…. მსურველები აწვდიან სასურველი პროდუქტის ფოტოს და ის ამზადებს ნივთს.
ნამუშევრების რეალიზებას, ძირითადად, ინტერნეტის მეშვეობით ვახერხებ. მყავს ბევრი ნაცნობი, სოციალური ქსელები ძალიან კარგად მუშაობს… მომხმარებელი გახლავთ ყველანაირი სეგმენტის წარმომადგენელი, თუმცა, ნამუშევრები ჯერ საზღვარგარეთ არ გამიტანია. მხოლოდ ადგილობრივ ბაზარს მოვიცავ, – აღნიშნავს ლევანი.
