ფერადი, შეხედვისთანავე დასამახსოვრებელი, აუცილებლად სასურველი და მომაჯადოვებელი – შეგვიძლია, ასე დავახასიათოთ ნივთები, რომლებსაც ნინო ახმეტელაშვილი ამზადებს. მისი ნამუშევრები ერთდროულად სიმყუდროვეს ქმნის და ახალისებს გარემოს. ნინოს შემოქმედება ძალიან მრავალფეროვანია – ის გვთავაზობს საათებს, ბრელოკებს, კალმებს, ჩანთებს, ჭიქის დასადგამებს, ლანგრებს, ზარდახშებს, ბეჭდებს, საყურეებს და რაც ყველაზე მეტად თვალშისაცემია – დომინოს.
საკუთარ ინტერესსა და სამუშაო პროცესზე, ხელოვანი „თბილისი თაიმსს“ ესაუბრა.
ნამუშევრებს რა მასალისგან ქმნით?
ვიყენებ უმაღლესი ხარისხის საკვებთან თავსებად უსაფრთხო ეპოქსიდს, სხვადასხვა ფერის პიგმენტებს, გლითერებს, ბუნებრივ – გამშრალ ყვავილებს.
ეს მიმართულება როგორ შეისწავლეთ?
ინტერნეტში მოძიებული მასალით, უცხოენოვანი ვიდეოებით და ექსპერიმენტებით შევისწავლე ეს საქმე – არანაირი ცოდნით ეპოქსიდის შესახებ, თუმცა, ძალიან დიდი ინტერესით და სიყვარულით, ზოგადად, ხელოვნების ამ დარგისადმი.
როგორ ფიქრობთ, რა გამოარჩევს თქვენს ნამუშევრებს?
ვფიქრობ, იმით გამოირჩევა, რომ ყოველთვის სულს და გულს ვდებ თითოეულ ნამუშევარში, რაიმე თუ არ გამოდის ისე, როგორც მინდა, რომ გამოვიდეს, შეიძლება, სამჯერ ან ოთხჯერაც კი მივუბრუნდე და ახლიდან გავაკეთო. შესაბამისად, შედეგით ყოველთვის კმაყოფილია მომხმარებელი. იმ შედეგს, რაც მე თვითონ არ მომწონს, მომხმარებელს არ გავუგზავნი. ამიტომაც, თავდაუზოგავად ვმუშაობ.
ალბათ, იდეა უამრავი გაქვთ – ხშირად სთავაზობთ მომხმარებლებს სიახლეებს?
სიახლეების გარეშე ვერ წარმომიდგენია ეპოქსიდზე მუშაობა. ვინც მიცნობს, ამ თემაზე ხუმრობენ კიდეც, მალე ყველაფერს ეპოქსიდში მოათავსებსო და მართლაც ასეა. დღე არ გავა ამაზე ფიქრის გარეშე, სხვაგვარად განვითარება შეუძლებელია.
გარდა ამისა, ხელოვნების სხვა მიმართულებებით თუ ხართ დაკავებული?
ძალიან მიყვარს ხატვა, ქსოვა და სამკაულების შექმნა. ალბათ, ამან განაპირობა, რომ ეპოქსიდზე მუშაობა მაბედნიერებს. მასში უამრავი რამ შეიძლება, გააერთიანო, სადამდეც ფანტაზია გაგწვდება ადამიანს.
