ფარცხალაძესთან დაკავშირებით “ნაციონალური მოძრაობის” განცხადებები პროკურატურის სისტემაზე პოლიტიკური თავდასხმაა , – ამის შესახებ საქართველოს თავდაცვის მინისტრმა, ირაკლი ალასანიამ დღეს გამართულ წლის შემაჯამებელ პრესკონფერენციაზე განაცხადა.
რაც შეეხება შეკითხვას ოთარ ფარცხალაძის წარსულთან დაკავშირებით, თავდაცვის მინისტრი მიიჩნევს, რომ ამ კითხვას დამაჯერებელი პასუხი უნდა გაეცეს.
“მინდა გითხრათ, რომ ეს არის პოლიტიკური თავდასხმა. წინა ხელისუფლებისთვის იყო გამორჩეული, რომელიც ორდენითაც კი დაჯილდოვდა და დღეს, როდესაც ეს საჯარო მოხელე გამოძიებამ “ნაციონალური მოძრაობის” ლიდერების კვალთან მიიყვანა, უცებ ხდება ცვლილება, ეჭვი შედის მის პროფესიონალიზმში, განათლებაში. ეს არის აშკარა პოლიტიკური თავდასხმა “ნაციონალური მოძრაობის” მხრიდან პროკურატურის სისტემაზე. რაც შეეხება კითხვებს, საზოგადოებას აღელვებს შეკითხვები, რომელიც პროკურორის წარსულს ეხება და მივიჩნევ, რომ დამაჯერებელი პასუხი უნდა გაეცეს. მთავრობა ვერ მოექცევა ოპოზიციის პოლიტიკური თავდასხმის ტყვეობაში და ვერ შეაჩერებს და პირიქით, უზრუნველყოფს ყველა საქმის გამოძიებას. აღელვების გარეშე უნდა შევისწავლოთ ეს ბრალდება და გადაწყვეტილება სახელმწიფოებრივი ინტერესებიდან გამომდინარე მივიღოთ. პრემიერს ეს არაერთხელ დაუდასტურებია, რომ სწრაფი და დამოუკიდებელი გადაწყვეტილების მიღება შეუძლია, როდესაც საჭიროდ ჩათვლის. მე გაგახსენებთ პრემიერის შს საქმეთა მინისტრობის დროს პირველი მოადგილის საკითხს”, – განაცხადა ირაკლი ალასანიამ.
27.12.13
Discussion about this post