გარემოს განსაკუთრებულს მინიმალური დეტალები ქმნის. საკუთარი გემოვნებით ჩვენ ვქმნით ინტერიერს, რომელიც გვსურს, იყოს სასიამოვნო და საინტერესო.
„თაბაშირა“ – გახლავთ ხელნაკეთი ნამუშევრების ერთობლიობა. კომპანია ქმნის დეკორატიულ კომპლექტებს, რომლებიც შეუმჩნეველი ვერავისთვის დარჩება. მათ ცოლ-ქმარი ამზადებს – ზურა კაჭარავა და ანა თედოშვილი. ისინი „თბილისი თაიმსს“ ესაუბრნენ.
რას სთავაზობთ მომხმარებელს?
ჩვენ ვამზადებთ თაბაშირისგან ლამაზ და დახვეწილ დეკორს, ამიტომაც, ჩვენს კომპანიას დავარქვით „თაბაშირა“. ჩვენი ძირითადი მიმართულებაა კომპლექტების შექმნა სხვადასხვა ფიგურისგან. კომპლექტების შედგენა დამოკიდებულია დღესდღეობით არსებულ ტრენდებზე და ჩვენი ფანტაზიით ვქმნით როგორც ერთ ფერში, ასევე, ჩვენი მომხმარებლების მიერ მოთხოვნილ ფერებში.
რა მასალას იყენებთ?
ჩვენ ვიყენებთ მაღალი ხარისხის სამხატვრო თაბაშირს, რომელშიც არის სპეციალური პლასტიფიკატორი. ასევ, ვამატებთ სიმყარისთვის თაბაშირის ცალკე პლასტიფიკატორს. გარდა ამისა, ვიყენებთ პიგმენტურ საღებავებს და დეკორატიულ ქვებს, რათა შევმატოთ ხასხასა ფერები ჩვენს ნაკეთობებს.
როგორ მიიღეთ შესაბამისი ცოდნა?
ჩვენ ვართ სტარტაპი და სანამ დავიწყებდით საქმიანობას, გავიარეთ სპეციალური კურსი, მაგრამ ყველაზე დიდი ცოდნა მივიღეთ და დღესაც ვიღებთ, როცა დავიწყეთ უშუალოდ ჩვენი „თაბაშირას“ განვითარება და თითოეულ ფორმაზე ინდივიდუალურად მუშაობა. არაერთი მასალა შევცვალეთ, რომ მიგვეღწია იმ ხარისხისთვის, რასაც დღესდღეობით ვქმნით.
უმეტესად, ვინ არის თქვენი პროდუქციის მომხმარებელი?
კონკრეტულ სეგმენტზე რთულია თქმა, ვიღებთ როგორც ინდივიდუალურ შეკვეთებს დიზაინერებისგან, ნეილ არტისტებისგან, ფოტოგრაფებისგან, ივენთ მენეჯერებისგან, ასევე, ძირითადად ქალბატონებისგან, რომლებიც ცდილობენ, ესთეტიური სილამაზე შესძინონ საკუთარ საცხოვრებელ გარემოს და გაალამაზონ ჩვენი დეკორით. ყველაზე მნიშვნელოვანია, რომ ჩვენი დეკორის ფასი იყოს ხელმისაწვდომი ყველასთვის. ამიტომაც, ჩვენი კომპლექტების ფასები იწყება 10 ლარიდან და მაქსიმალური ფასია 25 ლარი. კომპლექტში, ძირითადად, შედის 3-4 ნაკეთობა.
დღესდღეობით შეგვიძლია, მომხმარებელს შევთავაზოთ 15 კომპლექტი, ასევე, ვემზადებით საახალწლო პერიოდისთვის, სადაც სულ მალე დაგვემატება 25 კომპლექტი.
