ღვინის ჭიქისა და ქვევრის ფორმის სარკეები – გახლავთ პროდუქტი, რამაც ჩვენი ყურადღება განსაკუთრებულად მიიქცია. ჯადოსნური დიზაინის სარკეებს ანა ხუბუა ქმნის. გარდა ამისა, ის სხვა ვიზუალის, შთამბეჭდავი სარკეების ავტორიცაა. ხელოვანი ქმნის ნამუშევრების, რომლებიც ნებისმიერ ინტერიერს განსაკუთრებულ ხიბლს მატებს. ანა „თბილისი თაიმსს“ ესაუბრა
რა სახის ხელნაკეთ ნივთებს სთავაზობთ მომხმარებლებს?
ვამზადებ ხელნაკეთ კედლის დეკორატიულ სარკეებს, რომლებიც განსაკუთრებული ფორმებით გამოირჩევიან; ქართული მოტივებით საქართველოში პირველად ღვინის ჭიქისა და ქვევრის ფორმის სარკეებს, ასევე, მზის და გულის ფორმის სარკეებს სხივებისგან, რომელსაც მომხმარებლებში დადებითი განწყობა, სითბო და დადებითი ენერგიები მოაქვს. გარდა ამისა, ვამზადებ ხელნაკეთ ნაძვის ხის ბურთულებს პერსონალური ფოტოებით.
მათ რა მასალისგან ამზადებთ?
სარკეებს ძირითადად განსაკუთრებულ ფორმებს ვაძლევ სხივების მეშვეობით, ეს სხივები კი ხის მასალისა და მომხმარებლებისთვის სასურველი ფერის აკრილის საღებავით იღებება.
ცხადია, სპეციფიკური ცოდნაა საჭირო – ამ მხრივ, დეტალები რა გზით შეისწავლეთ?
ნივთების დამზადება შევისწავლე ამოუწურავი ინტერნეტრესურსის მეშვეობით, წლების განმავლობაში დაგროვებულმა გამოცდილებამაც ძალიან დიდი ცოდნა შემძინა, უფრო დავხვეწე დროთა განმავლობაში ჩემი ნამუშევრები. გარდა ამისა, იმ უნარებს, რაც ბიზნესის მართვას სჭირდება, ვანვითარებ სხვადასხვა პროგრამის მეშვეობით, რომელიც მეწარმე ქალებისთვის იქმნება.
უმეტესად, ვინ მოგმართავთ ნივთების შესაძენად?
ჩვენი მომხმარებლები არიან ადამიანები, რომლებსაც სურთ თავიანთი ინტერიერის განახლება, განსაკუთრებული და თანამედროვე სტილის შეტანა ინტერიერში. ასევე, ძალიან ხშირად მოგვმართავენ მომხმარებლები, რომლებსაც სურთ მათთვის საყვარელი ადამიანების დასაჩუქრება ჩვენი სარკეებითა და საახალწლო ორნამენტებით. ეს ძალიან დიდი პასუხისმგებლობაა ჩემთვის და ბედნიერი ვარ, რომ ჩემი შექმნილი ნივთები ძალიან ბევრი ადამიანის სიხარულს იწვევს.
თქვენს უახლოეს გეგმებში სხვა სახის ნამუშევრების დამზადებაც თუ შედის?
ჯერჯერობით, ისევ სარკეებზე მაქვს აქცენტი. ვგეგმავ, რომ სარკეებს იმაზე მეტი დატვირთვა მივცე, ვიდრე აქვს, მალე ვაპირებ სიახლის შემოტანას ამ მხრივ. გარდა ამისა, მინდა, საათებზეც გადავერთო აქტიურად.