“მაქვს თუ არა უფლება, ჩემზე უფროსი კაცი მიყვარდეს, რომელიც ქორწინებაში იმყოფება, მაგრამ სიყვარულს მეფიცება?! რამდენჯერმე დავშორდი, მაგრამ თავს არ მანებებს“, – ფრაზა, რომელიც არაერთხელ მოგისმენიათ, წაგიკითხავთ და ბევრი რჩევა გიკითხავთ, ან გაგიციათ, ყოველთვის აქტუალურია. მიუხედავად იმისა, რომ ამის პასუხი ყველამ იცის, მაინც ელიან, რომ სხვისგან სასურველ პასუხს მოისმენენ და თანაგრძნობას მიიღებენ.
მამა საბა ჭიკაიძე ტრადიციული კითხვა-პასხუის რეჟიმში სწორედ ამ მიღებულ შეკითხვას შემდეგნაირად განმარტავს:
“ამ კითხვაზე პირდაპირ გიპასუხებთ – უფლება არ გაქვთ, რომ გიყვარდეთ ადამიანი, კაცი, რომელიც არის ქორწინებაში და დაოჯახებულია. რაც უნდა სიყვარულს გეფიცებოდეთ, გარწმუნებდეთ თავის სიყვარულში და საჩუქრებს გიკეთებდეთ, ამას არავითარი მნიშვნელობა აქვს.
პირდაპირ მინდა გითხრათ, მთელი დამაჯერებლობით, ეს სიყვარული არ არის, ეს არის ვნება. ამიტომ, თქვენც ეცადეთ, თქვენი თავი გააკონტროლოთ და მისდამი არანაირი გრძნობა გაგიჩნდეთ. და თუ უკვე გაგიჩნდათ, მაშინ ეცადეთ, რომ საკუთარ თავს მოერიოთ.
დაიმახსოვრეთ, სხვის უბედურებაზე საკუთარ ბედნიერებას ვერავინ ააწყობს. ეს არავის გაუკეთებია, დღემდე ვერავის მოუხერხებია და ვერც ვერავინ მოახერხებს. ამიტომ ეცადეთ, რომ ფრთხილად იყოთ და სხვისი ოჯახის ნგრევის მიზეზი არ გახდეთ.
თუ იმ ადამიანს რაღაცა შინაგანი, სულიერი ბრძოლები აქვს და რაღაცას ვერ ალაგებს თავის მეუღლესთან, კომფორტის ზონა დაერღვა, მე სულითა და გულით ვურჩევ, საკუთარ თავს მიხედოს და კაცურად მოიქცეს. გაიაზროს, რომ ოჯახის კომფორტის ზონა არ არის. ბრძოლის ველი და ასპარეზია. როცა ასე ხარ განწყობილი, იცი, რომ უნდა იბრძოლო, მაშინ ღმერთი საჩუქრებს გაძლევს და იმაზე მეტი კომფორტი გეძლევა, ვიდრე საჭიროა. აუცილებლად, საბრძოლო განწყობა უნდა გქონდეს.
როგორც კი მეუღლესთან რაღაც არ გესიამოვნება და უკვე ფიქრობ, რომ მისამართი შემეშალა, ეს ცოლად არ უნდა მომეყვანაო, ასე არ არის. სხვა მოგეწონება, იმასთან მოგინდება და შეიყვარებ, ეს სიყვარული არ არის, ჩემო კარგო. ეს თავქარიანობა, არასერიოზული დამოკიდებულება ოჯახის მიმართ, უპასუხისმგებლობა ღვთის წინაშე და ვნებაა. ამიტომ კიდევ ერთხელ მინდა გითხრათ, არავითარ შემთხვევაში, თქვენს თავს უფლება არ მისცეთ, არა მხოლოდ კონკრეტულად ამ მამაკაცთან ურთიერთობაში, საერთოდ დაიმახსოვრეთ, რომ გაიგებთ, კაცი დაოჯახებულია, იქ ყველაფერი ჩაკეტეთ. იცოდეთ, რომ იქ აკრძალულ ხილს ეტანებით, რომელიც კარგად არავითარ შემთხვევაში დამთავრდება,“ – ამბობს სასულიერო პირი.
წყარო – “პრაიმ ტაიმი”
