ცოლის მკვლელობაში ბრალდებულ გიორგი კავლელაშვილს აღკვეთის ღონისძიების სახით პატიმრობა შეეფარდა. სხდომა კლინიკის პალატაში ცოტა ხნის წინ დასრულდა.
მოსამართლე არსენ კალატოზიშვილმა მედიასთან განმარტა, რომ ბრალდებულმა თავადაც ითხოვდა პატიმრობაში დატოვება, თუმცა ეს არ ნიშნავს, რომ ის დანაშაულს აღიარებს.
“არსებობდა როგორც დანაშაულებრივი საქმიანობის გაგრძელების საფრთხე, ისე საქმისათვის მნიშვნელოვანი ინფორმაციის განადგურების, მათ შორის მიმალვის საფრთხე. პოზიცია მისი იყო – დაეთანხმა, გრძნობდა რაღაც თავის მორალურ პასუხისმგებლობას, აქედან გამომდინარე, საწინააღმდეგო პოზიცია არ ჰქონია დაცვას”, – თქვა მოსამართლემ.
პროკურორმა არ უპასუხა კითხვას, არის თუ არა 30 წლის კაცი ძალადობის ბრალდებით წარსულშიც ნასამართლევი.
“ბრალდებულს, როგორც ასეთი პოზიცია არ დაუფიქსირებია, უბრალოდ ითხოვა, რომ ნამდვილად მას შეფარდებოდა პატიმრობა. […] მოტივი კონკრეტულ შემთხვევაში უნდა გამოიკვეთოს ბრალდებულის გამოკითხვით და საქმის მასალების კომპლექსური შედარებით”, – ამბობს პროკურორი.
ადვოკატის განცხადებით, აუცილებელია კაცს ექსპერტიზა ჩაუტარდეს.
“ბრალდებულის პოზიცია პროკურატურის შუამდგომლობასთან დაკავშირებით არ იყო საწინააღმდეგო. დღეს გაიგო მან, რომ მისი მეუღლე არის გარდაცვლილი და ჩავარდა ძალიან მძიმე ემოციურ მდგომარეობაში, იძახდა, რომ პასუხი უნდა ვაგოო, არ ვარ მე არაფრის ღირსი და ასე შემდეგ, მოკლედ ძალინ ემოციური ფონი იყო. […] მისი მონაყოლიდან გამომდინარე იკვეთება, რომ რაღაცეებს ვერ აცნობიერებდა, ვერ იხსენებს დეტალებს, რატომ და ვერც მოტივზე ვერ საუბრობს აქედან გამომდინარე, ვერც ყვება რატომ, რა მოხდა, დეტალურად, ამისთვის არის საჭირო ექსპერტიზა”, – ამბობს ადვოკატი.