100 000 ევროდ გაყიდული ჩვილები და ტრეფიკინგის უმძიმესი ბრალდება ექიმებს – დანაშაულის ადგილი კუნძული კრეტაა, თუმცა კვალი საქართველომდეც მოდის. საქართველოდან საბერძნეთში დონორად წასული სუროგატი დედები საზარელ ისტორიებს ჰყვებიან – ისინი მოატყუეს. ორსულობის პერიოდი უმძიმეს გარემოში გაატარებინეს, თანაც ისე, რომ აუკრძალეს კომუნიკაცია ოჯახის წევრებთან და მეგობრებთან. ეს ყველაფერი კი მხოლოდ 15 000 ევროს სანაცვლოდ.
სუროგატი ქართველი დედის აღსარება შემზარავია, თუმცა გერმანულ მედიაში გასული რეპორტაჟი სევდიან ამბავს არ ეხება. ამ თემით მედია მას შემდეგ დაინტერესდა, რაც ბერძენმა სამართალდამცველებმა კუნძულ კრეტაზე ჩვილებით ვაჭრობის სავარაუდო სქემა გაშიფრეს. კვალი კი საქართველომდე მივიდა.
„ყველაზე ცუდი იყო საცხოვრებელი გარემო. აქ ჩამოსვლის შემდეგ მთელი ორსულობის პერიოდში ვიმყოფებოდი მანიპულაციურ, კონტროლირებად გარემოში. მეკრძალებოდა სხვებთან კომუნიკაცია, მეგობრების ნახვა. თავს ვგრძნობდი მარტო, რაც ასეთ სიტუაციაში ძალიან რთულია. საქართველოში მირჩიეს, რომ საბერძნეთში არსებობს ასეთი კლინიკა“, – ამბობს სუროგატი დედა, თამუნა.
გზა საქართველოდან საბერძნეთამდე ქართულ კლინიკაზე გადის – გამოძიების მასალებით, საქართველო შუამავალი რგოლია. ქართველ სუროგატ დედებს ბერძნულ კლინიკასთან სწორედ ქართველი ექიმები აკავშირებდნენ, სწორედ ამიტომ გამოძიება ქართული გვარებითაც ინტერესდება.
„კურიერი P.S.-მა“ ექსკლუზიურად ჩაწერა ექიმი მაია ჩაკვეტაძე, რომელიც საქმის მასალებში ფიგურირებს. მედიკოსი ბრალდებას უარყოფს, თუმცა ადასტურებს, რომ მისი რეკომენდაციით კუნძულზე რამდენიმე ქალი ნამდვილად მოხვდა.
„იყო რამდენიმე შემთხვევა, როცა ქალებს არ სურდათ საქართველოში სუროგაცია და მე დავაკავშირე საბერძნეთის კლინიკას. ვეხმარებოდი მათ მხოლოდ დოკუმენტაციის მოწესრიგებაში, თარგმნაში. მე საქართველოში ლეგალური კომპანია მაქვს, ვსაქმიანობ აბსოლუტურად კანონის ჩარჩოებში. ჩემი სახელი ნახსენებია ალბათ იმიტომ, რომ რამდენიმე ქალს, ვისაც აქ არ სურდა სუროგატი დედა გამხდარიყო, მივაწოდე ინფორმაცია, რომ საბერძნეთში არსებობს ასეთი კლინიკა. რა სარგებელს იღებდით? – არანაირი ფინანსური დაინტერესება არ მქონია“, – ამბობს მაია ჩაკვეტაძე.
ჩვილებით უკანონო ვაჭრობისა და ტრეფიკინგის მუხლით ბრალდება ბერძნული კლინიკის ხელმძღვანელობასა და ექიმებს უკვე წარედგინათ.
კუნძულ კრეტაზე ჩვილებით ვაჭრობის სავარაუდო სქემით საერთაშორისო მედიაც დაინტერესდა. პრესა წერს, რომ სუროგატი დედები მუდმივი ექსპლუატაციის ქვეშ იყვნენ.
გაყალბებული საბუთებით საბერძნეთიდან ჩვილების გაყვანა სავარაუდო დანაშაულის მხოლოდ ერთი ეპიზოდია. გარკვეულ შემთხვევებში უშვილო წყვილები მოტყუებული რჩებოდნენ და სუროგაციაში დიდი თანხის გადახდის მიუხედავად, ქვეყნიდან ახალშობილების გაყვანას ვერ ახერხებდნენ.
„გვეგონა, რომ საბერძნეთი უსაფრთხო ადგილი იყო, სადაც ჩამოსვლა შეგვეძლო, თუმცა, სამწუხაროდ, ასე არ აღმოჩნდა. პრობლემა ის არის, რომ სუროგატთა ნაწილი უკან გაიქცა თავიანთ სამშობლოში, მომავალმა მშობლებმა შესაძლოა ვეღარც იპოვონ თავიანთი სუროგატი დედა. ხშირ შემთხვევაში ინფორმაციაც კი აღარ გვაქვს, არიან თუ არა ისინი ისევ ორსულად“, – ამბობს ორგანიზაცია Growing families-ის წარმომადგენელი სემ ევრიჰემი.
რა თანხას უხდიდა სუროგაციის უკანონო ქსელი ქართველ დონორებს? ბერძნული მედიის ინფორმაციით, საქართველოდან კუნძულ კრეტაზე ჩასულ სუროგატ დედებს ანაზღარების სახით 15 ათას ევროს ურიცხავდნენ, თუმცა მათ ნაწილს შენგენის ზონაში ცხოვრების სამთვიანი ვადის გასვლის გამო სოლიდური ჯარიმები დაეკისრა.
წყარო: rustavi2.ge
