მოსკოვში, Crocus City Hall-ზე თავდასხმის შედეგად დაღუპულთა რიცხვი 115-მდე გაიზარდა. ამის შესახებ ინფორმაციას BBC მოსკოვის რეგიონის გუბერნატორზე, ანდრეი ვორობიოვზე დაყრდნობით ავრცელებს.
მან ასევე აღნიშნა, რომ დაღუპულთა რაოდენობა მნიშვნელოვნად გაიზრდება. საგამოძიებო კომიტეტმა კი თქვა, რომ ამ დროისთვის მხოლოდ 41-ი პირის ცხედარია იდენტიფიცირებული.
შეგახსენებთ, რომ გასულ ღამეს მოსკოვში, Crocus City Hall-ში თავდასხმა იმ დროს მოხდა, როდესაც ჯგუფ “პიკნიკის” კონცერტი მიმდინარეობდა. როგორც თვითმხილველები ამბობენ, ხალხი საკონცერტო დარბაზში იჯდა და კონცერტის დაწყებას ელოდებოდა, როცა დარბაზში სროლა დაიწყო.
რუსეთის საგამოძიებო კომიტეტმა თავდასხმას ტერაქტის კვალიფიკაცია მიანიჭა. მოგვიანებით მედიაში გავრცელდა ინფორმაცია, რომ მოსკოვში მომხდარ ტერაქტში, ერთ-ერთი ეჭვმიტანილი დააკავეს, თუმცა ინფორმაცია ოფიციალურად დადასტურებული არ არის.
მოგვიანებით, თავდასხმაზე პასუხისმგებლობა ISIS-მა აიღო.