16 წლის ვახტანგ (ვახო) სალიას დებიუტი “დინამოს” პირველი გუნდის შემადგენლობაში შარშან შედგა, დღეს ის უკვე წარმატებით ეხმარება გუნდს. ვახო “დინამოს” აკადემიის აღზრდილია და თბილისური კლუბის სისტემაში 2016 წელს, 9 წლის ასაკში ჩაირიცხა.
12 მარტს სწორედ მისი გოლით მოახერხა “დინამომ” საშინაო მატჩში ქუთაისის “ტორპედოს” ძლევა.
უკვე კარგა ხანია ამ პატარა ბიჭის გარშემო არ წყდება მითქმა-მოთქმა. მას მსოფლიოში ერთ-ერთ ყველაზე პერსპექტიულ ჭაბუკ ფეხბურთელად მიიჩნევენ და ხან “ქართველ მარგალიტს” უწოდებენ, ხანაც “ქართული ფეხბურთის ამომავალ ვარსკვლავს”, რაც სულაც არ არის გადაჭარბებული შეფასებები, რაშიც ადვილად დარწმუნდებით, თუ მის თამაშს ერთხელ მაინც ნახავთ.
ის იცავდა U16-სა U17 -ს ღირსებასაც.
ბრიტანული HITC-ის ცნობით, მისით ამ ეტაპზე “არსენალი” და “მანჩესტერ სიტი” არიან დაინტერესებულები და მის შეძენას განიხილავენ.
იქვე აღნიშნულია, რომ ქართველ ვუნდერკინდს ხვიჩა კვარაცხელიასადარებენ და მას აგრეთვე “ჩელსი”, “ტოტენჰემი”, “ლივერპული”, “მანჩესტერ იუნაიტედი”, “რეალი”, “ატლეტიკო”, “ბარსელონა”, პსჟ, “ბაიერნი” და “დორტმუნდი” აკვირდებიან.
გამოცემა წერს, რომ არ არის გამორიცხული, სალია ევროპის ჩემპიონატზე საქართველოს ნაკრების განაცხადში მოხვდეს.
გასული წლის მიწურულს გავრცელდა ინფორმაცია, რომ მისით ესპანური “ბეტისი” იყო დაინტერესებული და მოლაპარაკებებიც თითქოს დაწყებული იყო.
“ლაპარაკია 16 წლის ქართველი მარგალიტის შეძენაზე. ის 2007 წელს დაბადებული, შემტევი მოთამაშეა, რომელსაც ევროპის წამყვანი კლუბები აკვირდებიან. “ბეტისი” ცდილობს მოაგვაროს ბიუროკრატიული წინააღმდეგობები, რაც დაკავშირებულია ევროკავშირის არაწევრი ქვეყნებიდან არასრულწლოვანი მოთამაშის გასაყვანად”, – წერდა ესპანური გამოცემაRelovo გასული წლის ნოემბერში.
