7 აპრილს ბოჭორმის ქუჩაზე, მაღაზია „ბეთლგრაუნდის“ სასროლეთში მომხდარი აფეთქების ერთ-ერთი მსხვერპლი ლევან ჯეირანაშვილია.
ლევან ჯეირანაშვილის ტრაგიკულ გარდაცვალებას ოჯახის ახლობელი, მარინე ბერიძე სოციალურ ქსელში ემოციური პოსტით ეხმაურება.
„გუშინ, იმ ავბედითი აფეთქებისას, გარდაიცვალა იქ სრულიად შემთხვევით მყოფი ჩვენი მეზობელი, ჩვენი მეგობრების შვილი და ჩვენი შვილების მეგობარი, ახალგაზრდა კაცი, სამი შვილის მამა, ლევან ჯეირანაშვილი. 90-იანი წლები ერთმანეთს გადავატანინეთ, ერთად ვზიდეთ პირადი და საზოგადო ტვირთი. შვილებს ერთმანეთი შევაყვარეთ…
ერთ სკოლაში სწავლობდნენ. დილით ერთ „ნივაში“ ქაფშიებივით ეწყობოდა 9 ბავშვი. ერთ რამედ ღირდა მერე სკოლის ეზოში ამათი იმ „ნივიდან“ ჩამოცლა: ჯერ ყველაზე პატარა თეკლა, მერე მიყოლებით: დედუნი, ელისო, ირაკლი, ბაისო, ილია, ნინო, ლევანი…ლევანი ყველაზე უფროსი იყო. დღეს მზე ასე დაბნელდა 90-იანების მე-18 კორპუსელებისთვის. ნანა, გურამ, თქვენთან ერთად დავტირით ჩვენს ღიმილის ბიჭს. ნათელი დაუმკვიდროს უფალმა!“ – წერს მარინე ბერიძე.
