ისრაელში მცხოვრები, ქართველი ექიმი, დიანა გოგბერაშვილი „იმედინიუსთან“ აცხადებს, რომ ისრაელი ახლა მოლოდინის რეჟიმშია, რაც ემოციურად ძალიან რთულია.
ექიმის თქმით, კლინიკიდან მიიღეს გაფრთხილებაა, რომ არც ერთმა თანამშრომელმა ტელეფონს ხმა არ გაუთიშოს.
„მოლოდინის რეჟიმი უფრო რთულია ჩვენთვის. ფაქტის წინაშე რომ დგები, მაშინ უფრო მობილიზებული ხარ. ახლა სახლში ვარ. ბოლო 5 დღეა კლინიკის მენეჯმენტისგან გაფრთხილებულები ვართ, რომ სრულ მზადყოფნაში ვიყოთ, რადგან შეიძლება ნებისმიერ წამს სამსახურში გამოგვიძახონ. კლინიკაში თანამშრომლებს ვესაუბრე და ახლა იქ ჩვეულებრივ რეჟიმში მიმდინარეობს ყველაფერი. ახლა აშკელონის ქუჩებში მანქანები იმ სიხშირით გადაადგილდება, როგორც სხვა დღეებში. შევნიშნე რამდენიმე ვერტმფრენი და ასევე პერიმეტრს აკონტროლებს რამდენიმე დრონი“, – აღნიშნა ქართველმა ექიმმა.
როგორც ცნობილია ისრაელის თავდაცვით ძალებში დაადასტურეს, რომ ირანმა ისრაელის წინააღმდეგ დრონების გამოყენებით თავდასხმა დაიწყო.
„ცოტა ხნის წინ ირანმა თავისი ტერიტორიიდან ისრაელის სახელმწიფოს ტერიტორიის მიმართულებით უპილოტო საფრენი აპარატები გაუშვა“, – ნათქვამია თავდაცვითი ძალების განცხადებაში.
ისრაელის არმიაში ხაზგასმით აღნიშნეს, რომ ყველა სამიზნეს აკონტროლებენ.
