სპეციალისტები ვარაუდობენ, რომ 2014 წლის მეორე ნახევარში ნავთობის ფასი 2013 წლის დეკემბრის მაჩვენებელთან შედარებით 15%-ით ნაკლები იქნება
ლიბიის მიერ ნავთობის მოპოვების განახლების ფონზე, საწვავის მსოფლიო ფასები შემცირებას განაგრძობს. 2 იანვრის ვაჭრობის შედეგად, WTI-ს ტიპის ნავთობის ღირებულება ბარელზე 2, 98 დოლარით შემცირდა და 95,44 დოლარი შეადგინა. Brent-ის ნავთობი კი 3,02 დოლარით გაიაფდა და 107,78 დოლარს გაუტოლდა.
„შავი ოქროს“ გაიაფების ერთ-ერთი მიზეზია ასევე სპეკულაციები კუშინგის საცავში (ოკლაჰომას შტატი) ნედლი ნავთობის მარაგის გაზრდასთან დაკავშირებით.
შეგახსენებთ, რომ 2014 წლის პირველი დღის ვაჭრობაზე ამერიკის შეერთებული შტატების საფონდო ინდექსები – DJIA და Nasdaq-ი შემცირდა.
2013 წლის ბოლოს ექსპერტები მოპოვებული ნავთობის სიჭარბის პრობლემაზე საუბრობდნენ. ახლა რთულია იმის პროგნოზირება, როგორი იქნება „შავი ოქროს“ ფასი მას შემდეგ, რაც მსოფლიო ბაზარზე ნავთობი ირანიდან შევა, დასრულდება ლიბიაში ამბოხებულების მიერ ნავთობტერმინალების ბლოკადა და სირიაში არსებული სიტუაციის მშვიდობიანი დარეგულირება მოხდება.
ამის მიუხედავად, ექსპერტები ვარაუდობენ, რომ წლის მეორე ნახევარში ნავთობის ფასი 15%-ით დაიწევს 2013 წლის დეკემბრის მაჩვენებელთან შედარებით.
რაც შეეხება საქართველოს, შეგახსენებთ, რომ ქართულ ბაზარზე საწვავის ფასი ბოლოს 2013 წლის 19 დეკემბერს შეიცვალა, როდესაც თითქმის ყველა ნავთობკომპანიამ სახეობების მიხედვით, პროდუქცია საშუალოდ, 5-7 თეთრით გააძვირა. მიზეზად ლარის კურსის დაცემა დასახელდა.
03.01.14
