გასული სეზონის წინ გიორგი მიქაუტაძე მეციდან ამსტერდამის აიაქსში გადავიდა. საბოლოო ჯამში, ქართველმა ფეხბურთელმა ნიდერლანდურ გუნდში ფეხი ვერ მოიკიდა და ისევ საფრანგეთში დაბრუნდა, სადაც შესანიშნავი სეზონი ჩაატარა და ასევე იდეალურად იასპარეზა ევროპის ჩემპიონატზეც.
ჟორჟმა L’Équipe-თან ინტერვიუშიც აღნიშნა, რომ ნიდერლანდებში მან რთული პერიოდი გამოიარა და შესაბამისს პირობებს არ უქმნიდნენ.
ცოტა ხნის წინ, აიაქსის ყოფილმა ფეხბურთელმა, ჯონ ვან ლოენმა De Oranjekantine-თან ინტერვიუში მიქაუტაძე გააკრიტიკა. რაც არ უნდა უცნაურად ჟღერდეს, მისი აზრით, ყველაფერი, საბოლოო ჯამში, ქართველის ბრალი იყო. სხვათა შორის, ვან ლოენს საქართველოშიც აქვს ნამუშევარი – ის თბილისის ლოკომოტივს 2022 წელს წვრთნიდა.
“მიქაუტაძე აიაქსში თავს კარგად არ გრძნობდა, შესაბამისად, ჯონ ვან’ტ სხიპს მივწერე და ვკითხე, შემეძლო თუ არა დახმარება, ისიც დამთანხმდა. მიქაუტაძესთან ერთად საჭმელად გასვლას ვაპირებდი, მაგრამ, საბოლოო ჯამში, ეს არ მოხდა, მან შეხვედრა გააუქმა. მინდოდა, მეჩვენებინა, როგორ მუშაობს აიაქსში ყველაფერი.
არიან მოთამაშეები, რომლებიც ამბობენ, რომ ისინი აიაქსში არასწორი გზით მიდიან, მაგრამ ეს აბსოლუტური ნონსენსია. ყველა საფეხბურთო კლუბში უნდა იპოვო სახლი. საბოლოო ჯამში, მიქაუტაძეს ვარჯიშის შემდეგ ვესაუბრე. ის ინგლისურად ვერ ლაპარაკობს და ვფიქრობ, რომ სწავლაც არ უნდა. არის თუ არა ნაწილობრივ მისი ბრალი, რომ არაფერი გამოვიდა? არა, ეს მთლიანად მისი ბრალია. არ მაინტერესებს, რომ აიაქსს აკრიტიკებს, მაგრამ ვფიქრობ, რომ მისგან ეს საწყენია. იყავი კაცი და აღიარე, რომ ეს არასწორად გააკეთე”, – აღნიშნა ვან ლოენმა.
მიქაუტაძე აიაქსმა შარშან სწორედ მეცისგან 16 მილიონ ევროდ შეიძინა, თუმცა მას ამსტერდამში შანსი პრაქტიკულად არ მიეცა, მხოლოდ 9 მატჩი ჩაატარა და იანვარში იჯარით მეცში დაბრუნდა. საფრანგეთის ლიგა 1-ის გასულ სეზონში მან 22 შეხვედრაში თავის 14-ჯერ გამოჩენაც შეძლო. ცოტა ხნის წინ კი, ფრანგულმა კლუბმა ჟორჟი გამოისყიდა და ახლა მის ტრანსფერს გეგმავს.
