ორი კაცის მკვლელობისთვის ბრალდებულის სახლი ახმეტაში პოლიციის ალყაშია. სამართალდამცველები ასე ცდილობენ აირიდონ ახალი შურისძიება. გაქცეულს კი მთელი ქვეყნის მასშტაბით ტყე-ტყე ეძებენ. ის შეიარაღებულია. ირკვევა, რომ სახლიდან წაღებული აქვს დანაშაულის იარაღები, საიდანაც ცეცხლი წიქარაძემ ორ თანასოფლელს გაუხსნა. სასიკვდილოდ გაიმეტა ბავშვობის მეგობარი და ნათელმირონი.
არჩილ გაწერიძეს მეგობარმა სახის არეში ათამდე ტყვია დამიზნებით ესროლა. მოკლულია კახაბერ ზათიაშვილიც, რომელმაც სიკვდილამდე მოასწრო პოლიციისთვის ეთქვა, ვინ იყო დამნაშავე. ბრალდებულის კვალზე გასვლას სამართალდამცველები ამ დრომდე ვერ ახერხებენ.
