“მოსკოვი მოუწოდებს ლონდონს, თავი შეიკავოს მომიტინგეების მიმართ გაუმართლებელი და არაპროპორციული ძალის გამოყენებისგან“, – ამის შესახებ რუსეთის საგარეო საქმეთა სამინისტროს სპიკერი, მარია ზახაროვა აცხადებს.
- “ყურადღება მიიპყრო ბრიტანეთის მთელ რიგ ქალაქებში მასობრივმა საპროტესტო აქციებმა, რომელიც 29 ივლისს ცეკვის სტუდიაზე თავდასხმას მოჰყვა. მანიფესტაციები არეულობაში გადაიზარდა და მთელი ქვეყნის მასშტაბით მომიტინგეები დააკავეს. მიუხედავად ბრიტანეთის ხელისუფლების მიერ სიტყვით გამოხატული ერთგულებისა დემოკრატიული პრინციპების მიმართ, ქვეყნის შს მინისტრმა პოლიციას უფლება მისცა, გამოიყენოს მაქსიმალურად მკაცრი ზომები მომიტინგეების მიმართ“, – აცხადებს ზახაროვა.
დიდ ბრიტანეთში, არეულობის დაწყებიდან დღემდე 378 ადამიანი დააკავეს, – ამის შესახებ ინფორმაციას დიდი ბრიტანეთის პოლიცია ავრცელებს.
„ველით, რომ ეს რიცხვი ყოველდღიურად გაიზრდება, რადგან პოლიციელები მონაწილეთა იდენტიფიცირებას და დამნაშავეთა დაკავებას განაგრძობენ“, – განაცხადა დიდი ბრიტანეთის ეროვნული პოლიციის მეთაურთა საბჭოს ხელმძღვანელმა, გევინ სტივენსმა.
შეგახსენებთ, გასულ ორშაბათს, ქალაქ საუთპორტში ცეკვის სკოლაში დანით შეიარაღებული პირის თავდასხმის შედეგად, სამი ბავშვი დაიღუპა. სამართალდამცავებმა 17 წლის თავდამსხმელი ბიჭი დააკავეს. პოლიციის ცნობით, დიდ ბრიტანეთში არეულობა მას შემდეგ დაიწყო, რაც სოციალურ ქსელში თავდამსხმელის ვინაობის შესახებ ინფორმაცია გავრცელდა, რომ ის რადიკალი ისლამისტი მიგრანტი იყო.
