ბათუმის მოსწავლე ახალგაზრდობის სასახლეში მომხდარზე, რა დროსაც ცეკვის მასწავლებელმა 12 წლის მოზარდს სცემა, მოზარდის მამა „მთავარ არხთან“ საუბრობს.
მოზარდის მამის თქმით, ის ცეკვის პედაგოგს ბავშვზე „ე.წ. წამორტყმასთან დაკავშირებით“ სხვა დროსაც ესაუბრა.
„ადრე, ბავშვზე ე.წ. წამორტყმასთან დაკავშირებით მქონდა საუბარი, მაგრამ მშვიდობიანად დავცილდით, ავუხსენი, რომ არასწორი ფორმა და დაუშვებელი იყო, მანაც მითხრა, რომ არ განმეორდებოდა.
იმას, რაც ახლა თქვენ კადრში ნახეთ, ვერც კი წარმოვიდგენდი. როდესაც ჩვენი ოჯახის წევრი ბავშვის გამოსაყვანად მივიდა, ბავშვი იყო ნამტირალევი და სერიოზულად განერვიულებული. ბიცოლას უთხრა, მასწავლებელმა გამლახაო. იქვე დაუწყო საქმის გარჩევა [მასწავლებელმა], ბავშვს უყვიროდა და თვალებს უბრიალებდა: „ვინ დაგარტყა, მე ხელი არ დამიკარებიაო“.
როდესაც ჩემი მეუღლე მივიდა და სთხოვა აეხსნა, რაში იყო საქმე, ის აგრესიული იყო, ჩემი დისკენ გაიწია, ჩემებმა საპატრულო პოლიციას გამოუძახეს, ამოიღეს კადრები და ამის შემდეგ გახდა ცნობილი, თუ რასთან გვქონდა საქმე“, – ამბობს მოზარდის მამა „მთავარ არხთან“.
ფაქტის ამსახველი კადრები გამოცემა „ბათუმელებმა“ გაავრცელა. მედიის ინფორმაციით, ერთი გაკვეთილის განმავლობაში მასწავლებელმა ბავშვზე არაერთხელ იძალადა, როგორც ფიზიკურად, ისე ფსიქოლოგიურად და ფაქტს სხვა ბავშვებიც ესწრებოდნენ.
