საქართველოს საგანგებო და სრულუფლებიანი ელჩი ეთიოპიის ფედერაციულ დემოკრატიულ რესპუბლიკაში ვახტანგ ჯაოშვილი ქვეყნის პრეზიდენტს მულატუ ტეშომე ვირტუს შეხვდა.
როგორც საგარეო უქწყებიდან “თბილისი თაიმსს” აცნობეს, ელჩმა ეთიოპიის პრეზიდენტს მიულოცა უმაღლესი თანამდებობის ოფიციალურად დაკავება და აღნიშნა, რომ საქართველო დიდ მნიშვნელობას ანიჭებს ეთიოპიასთან ურთიერთობების შემდგომ განვითარებას.
პრეზიდენტმა მაღალი შეფასება მისცა საქართველოს ხელისუფლების გადაწყვეტილებას ეთიოპიაში საელჩოს გახსნასთან დაკავშირებით, რაც, მისი თქმით, კიდევ უფრო დააჩქარებს და გააღრმავებს ორ ქვეყანას შორის მეგობრულ კავშირებს.
ეთიოპიის პრეზიდენტმა მულატუ ტეშომე ვირტუმ ასევე აღნიშნა, რომ იგი იყო ეთიოპიის პირველი საგანგებო და სრულუფლებიანი ელჩი საქართველოში (რეზიდენციით ქ. ანკარაში) და მისი უშუალო ჩარევით და ძალისხმევით მოხერხდა ქ. ადის-აბებაში საელჩოს გახსნისთვის აუცილებელი პროცედურების დაჩქარება. მან ასევე გამოხატა კმაყოფილება, რომ ქ. ადის-აბებაში უკვე გახსნილია და ფუნქციონირებს საქართველოს საელჩო. საუბრისას პრეზიდენტმა თბილად გაიხსენა საქართველოში სტუმრობაც.
პრეზიდენტის განცხადებით, არსებობს მრავალი სფერო, რომელშიც თანამშრომლობა ურთიერთხელსაყრელი იქნება და რეალურ შედეგებს მოუტანს ორივე სახელმწიფოს. მისი თქმით, ეთიოპიის მხარე საქართველოსთან მიმართებაში დაინტერესებულია არა მხოლოდ თანამშრომლობით, არამედ მისი გამოცდილების გაზიარებითაც.
ელჩმა პრეზიდენტს განუცხადა, რომ საქართველოს საელჩოს გახსნიდან მცირე დროის გასვლის მიუხედავად, უკვე შეინიშნება ქვეყნებს შორის ურთიერთობებში გარკვეული წინსვლა: ახლო მომავალში ხელი მოეწერება ორი ქვეყნის საგარეო საქმეთა სამინისტროებს შორის ურთიერთგაგების მემორანდუმს, მიმდინარე წლის განმავლობაში საგარეო საქმეთა სამინისტროებს შორის შესაძლებელია პოლიტიკური კონსულტაციების გამართვა, გასულ წელს მნიშვნელოვნად გაიზარდა სავაჭრო ბრუნვა, დამყარდა ახალი კავშირები განათლებისა და კულტურის სფეროში, დაწყებულია მუშაობა ორი ქვეყნის ეროვნულ მუზეუმებს შორის თანამშრომლობის მემორანდუმის გაფორმებაზე, რის საფუძველზეც შესაძლებელი იქნება ერთობლივი გამოფენებისა თუ არქეოლოგიური ექსპედიციების მოწყობა.
შეხვედრის ბოლოს საქართველოს წარმომადგენელმა მადლობა გადაუხადა ეთიოპიის პრეზიდენტს იმ დახმარებისთვის, რომელიც მან აღმოუჩინა ქართულ მხარეს საელჩოს ოპერატიულად გახსნის უზრუნველსაყოფად.
09.01.14