საკრებულოს თავმჯდომარის მოადგილის განცხადებით, ქ. თბილისის მერის მოვალეობის შემსრულებლის ქალბატონ სევდია უგრეხელიძის დღევანდელი ღია წერილი ნათელი მაგალითია იმისა, თუ როგორ არასერიოზულად უყურებდა მერია თბილისელთა პრობლემებს. “მინდა თბილისელებმა იცოდნენ, რომ საკრებულოს გადაწყვეტილების შემდეგ მერიას უფლება აქვს ქალაქის ინფრასტრუქტურის ფუნქციონირებისათვის ყოველთვიურად 60 მილიონი ლარი დახარჯოს. ამის შესახებ საბიუჯეტო კოდექსში პირდაპირაა მითითებული. ის, რომ თბილისის მერიის მთავრობის წევრები სოციალური პროექტების შეჩერებაზე გვესაუბრებიან, სხვა არაფერია თუ არა თბილისელთა მიმართ საბოტაჟი. მინდა შევახსენო თბილისელებს, რომ გასულ წელს მიუხედავად უამრავი პრობლემებისა, მერიას დაუხარჯავი 100 მილიონი ლარი დარჩა. მიმდინარე წლის იანვარში გათვალისწინებული 60 მილიონი ლარი ყველა სტრუქტურისა და პროგრამის ნორმალურად ფუნქციონირების საშუალებას იძლევა. თბილისის საკრებულო კონსულტაციებისათვის მზადაა, თუმცა საქმე აქაც დემაგოგიასთან გვაქვს. მიუხედავად მრავალგზის მოთხოვნისა, საკრებულოში 2014 წლის იანვრის ხარჯვითი ნაწილის ჩაშლილი ვარიანტი არ შემოსულა. ეს არის ნათელი მაგალითი იმისა, თუ როგორ უყურებს მერია თბილისელთა პრობლემებს’’,–განმარტა ჯაბა სამუშიამ. თბილისის მერის მოვალეობის შემსრულებლის სევდია უგრეხელიძის განცხადებით, 2014 წლის ბიუჯეტის დაუმტკიცებლობის გამო ბიუჯეტის პროექტში გაწერილი პროგრამების დაფინანსება დროულად ვეღარ მოხდება. 14.01.14