ეთიოპიაში მარბურგის ვირუსის ეპიდემიის გავრცელება ოფიციალურად დადასტურდა. აფრიკის დაავადებათა კონტროლის ცენტრის ცნობით, ვირუსი ქვეყნის სამხრეთ ნაწილში ვრცელდება.
„მარბურგის ვირუსი“ ერთ-ერთი ყველაზე საშიში ჰემორაგიული პათოგენია, რომელიც ებოლას ჰგავს და იწვევს მძიმე სისხლდენას, მაღალ სიცხესა და დიარეას. ინფექციის ინკუბაციის პერიოდი 21 დღემდეა, ხოლო სიკვდილიანობა 25%-დან 80%-მდე მერყეობს.
ჯანდაცვის მსოფლიო ორგანიზაციის ინფორმაციით, სამხრეთ ეთიოპიაში მინიმუმ 9 ინფიცირების შემთხვევაა დადასტურებული. დიაგნოზი ქვეყნის ეროვნულმა ლაბორატორიამ ოფიციალურად დაადგინა და მიმდინარეობს დამატებითი ეპიდემიოლოგიური კვლევები. ექიმების თქმით, გამოვლენილი შტამი შესაძლოა დაკავშირებული იყოს აღმოსავლეთ აფრიკაში ადრე გავრცელებულ ვარიანტებთან.
მარბურგის ეპიდემია ბოლო წლებში სხვა რეგიონებშიც დაფიქსირდა – ტანზანიაში მას 10 და რუანდაში 15 ადამიანის სიცოცხლე ემსხვერპლა. ვირუსის წინააღმდეგ ვაქცინა ამჟამად არ არსებობს.
