2025 წლის 29 ნოემბერს, ქუთაისში გაიმართება მასშტაბური სამედიცინო კონფერენცია თემით: „XXI საუკუნის გამოწვევები მედიცინაში“. ღონისძიებას ორგანიზებას უწევს ა(ა)იპ თავისუფალი საზოგადოება – ახალი ნაკადის ჯანდაცვის ფოკუს ჯგუფი და ა(ა)იპ „თეთრი ხალათი“, ქუთაისის მუნიციპალიტეტის შუამდგომლობითა და აკაკი წერეთლის სახელმწიფო უნივერსიტეტის მასპინძლობით.
კონფერენციის მიზანია თანამედროვე მედიცინაში არსებულ ტენდენციებზე, ახალ ტექნოლოგიებზე, ტელემედიცინაზე, ხელოვნური ინტელექტის როლსა და ჰოლისტიკურ მიდგომებზე მსჯელობა, აგრეთვე რეგიონებში მომუშავე სამედიცინო პერსონალის გამოწვევებისა და საჭიროებების გამოკვეთა.
ღონისძიება გახდება დასაწყისი რეგიონული კონფერენციების მსხვილი ციკლისა – „რეგიონული ჯანდაცვის გაძლიერება საქართველოში“, რომელსაც ერთობლივად ახორციელებენ ა(ა)იპ თავისუფალი საზოგადოება – ახალი ნაკადის ჯანდაცვის ფოკუს ჯგუფი და ა(ა)იპ „თეთრი ხალათი“.
ინიციატივის მთავარი ამოცანებია:
- რეგიონში მომუშავე სამედიცინო პერსონალის საჭიროებების წინ წამოწევა;
- რეგიონული პირველადი ჯანდაცვის გაძლიერება;
- ადგილობრივი სამედიცინო პერსონალის პროფესიული ავტორიტეტის ამაღლება;
- თანამედროვე სამედიცინო სიახლეებისა და ტექნოლოგიების ხელმისაწვდომობა;
- სამედიცინო სპეციალისტების უწყვეტი განათლების ხელშეწყობა;
- პაციენტზე ჰოლისტიკური მიდგომების გაძლიერება.
სამიზნე აუდიტორია
კონფერენცია განკუთვნილია:
- მუნიციპალიტეტის ჯანდაცვის სამსახურის წარმომადგენლებისთვის;
- სამედიცინო ფაკულტეტის სტუდენტებისა და რეზიდენტებისთვის;
- პირველადი ჯანდაცვის ექიმებისთვის;
- სკოლის ექიმებისთვის;
- სხვადასხვა სფეროს ჯანდაცვის სპეციალისტებისთვის;
- მედიცინის სიახლეებით დაინტერესებული პირებისთვის.
დასწრება სრულიად თავისუფალი და უფასოა.
