როგორც იცით, მარტის დასაწყისში, საჰაერო თავდაცვის სისტემები დუბაის ცაზე ირანული დრონებისა და რაკეტების იერიშს იგერიებდა. ირანის იერიშების შედეგად დაზიანდა დუბაის საერთაშორისო აეროპორტიც.
ამ დროს, ომანიდან თბილისში საქართველოს მოქალაქეების ჩამოსაყვანად, კერძო თვითმფრინავის მიერ შესრულებულ პირველ რეისს, დიდი ხმაური მოჰყვა. სწარაფად გაზიარდა ქეთო თოფურიძის მიერ „ინსტაგრამზე“ განთავსებული ფოტო და პოსტი:
„როგორც იქნა სახლში ვარ. თბილისი, საქართველო. მადლობა ყველას სიყვარულისთვის და მხარდაჭერისთვის…“ – წერდა ეკა კახიანის ნაბოლარა ქალიშილი ფოტოზე, სადაც დასთან, ანასტასია თოფურიძესთან და ნოშიკო ნამორაძესთან ერთად არის გადაღებული. სწორედ ამ უკანასკნელის მიერ დაქირავებული კერძო თვითმფრინავით მოხდა ადამიანების ახლო აღმოსავლეთიდან ჩამოყვანა.
ბიზნესმენ ნოშიკო ნამორაძის მეუღლემ, ნინო სუთიძემ კი განმარტა, რომ ეს იყო მეგობრული და ჰუმანიტარული ნაბიჯი:
„მე თბილისში ვიყავი, ჩემმა მეუღლემ კი ჩამოიყვანა ისინი, ვისაც ეს სჭირდებოდა. მასკატიდან გამოფრინდნენ 14-კაციანი ბორტით. ჩვენ ხშირად ვართ დუბაიში, საქმიანობიდან გამომდინარე. ბორტზე ძალიან შინაურები ისხდნენ, ასევე ორი ადამიანი, იქაურები, ვინც ითხოვა წამოსვლა. ეკა კახიანის ოჯახთან ძალიან ვმეგობრობთ. გოგოები იქ იყვნენ, ეკამ დამირეკა და მითხრა… ასე გადაწყდა მათი წამოყვანა. ეს იყო უბრალოდ პირველი კერძო რეისი. ამ ამბის პოლიტიკურ ჭრილში გადაყვანა არასწორია.”
ამ რეისს დაემთხვა თბილისის მერის დუბაიში ჩარჩენაც, რომელიც იქ, ცოლ-შვილთან ერთად დაბადების დღის გადასახდელად იყო და შექმნილი სიტუაციიდან გამომდინარე, სამშობლოში, რამდენიმე დღის დაგვიანებით დაბრუნდა.
„სკანდალური რეისის“ ერთ-ერთი მგზავრი, ქეთო თოფურიძე კი „ზმნასთან“ ინტერვიუში აცხადებს, რომ ეს აბსურდული ისტერიკა მისთვის გაუგებრად ატყდა.
ქეთო თოფურიძე: უკვე ერთი წელია დუბაიში ვცხოვრობ. იქ საცხოვრებლად აპრილში გადავედი. ქართულ დეველოპერულ კომპანია „ნექსთში“ ვმუშაობ, რომელიც იქ სახლებს აშენებს. გენერალური მენეჯერის თანამდებობას ვიკავებ. საქართველოში იშვიათად ჩამოვდივარ.
ჩემი და, ანასტასია იყო ჩემთან ერთად. ძალიან მოულოდნელად არეულობა დაიწყო. დუბაი, რომელიც ბევრი წელია, მსოფლიოში ერთ-ერთ ყველაზე უსაფრთხო ქალაქად სახელდება, უცებ დრონების და რაკეტების ეპიცენტრში აღმოჩნდა, რაც არავის წარმოედგინა. ეს ამბები რომ დაიწყო, მეორე დღეს ნოშიკო ნამორაძემ, რომელიც მეუღლესთან ერთად ჩვენი ოჯახის ახლობელია, გადაწყვიტა, რომ 14 კაციანი თვითმრინავით მისი შინაურები და ახლობლები ჩამოეყვანა. ნოშიკო იყო პირველი, რომლებმაც დუბაიდან ქართველები წამოიყვანა. ამის შემდეგ დაინიშნა ჩარტერული რეისები. ძალიან პანიკური სიტუაცია იყო, ფაქტობრივად, ომში ვიყავით. ერთ-ერთი პირველია ჩვენი ქვეყანა, ვინც ჩარტერი დანიშნა.
რომ ჩამოვფრინდით, ამის აღსანიშნავად ფოტო გადავიღე და დავდე „ინსტაგრამზე“ და ატყდა ერთი ამბავი! ჩემი მეგობრები იქ დარჩნენ, მძიმე მდგომარეობაში და განვიცდიდი მათ მდგომრეობას. ჩემთვის იყო ყოვლად გაუგებარი ამ ადამიანების დამოკიდებულება. შეგრძნება მაქვს, რომ არ უხარიათ, რომ კარგად ხარ. ეს ადამიანები ხომ არ არიან უცხოები? ჩვენ ხომ თანამოქალაქეები ვართ. ჩვენ ხომ ერთი ქვეყნის შვილები ვართ და რატომ აქვთ ასეთი მძიმე დამოკიდებულება კარგად მყოფი ადამიანის მიმართ, ვერ ვხვდები. როცა ხედავენ, რომ ადამიანს არ აქვს პრობლემა, კარგად ცხოვრობს (ვისთვის რა არის კარგად ცხოვრება), ცუდად ხდებიან. ეს მე ძალიან მწყინს და მაწუხებს. მე ყველა – ვიცნობ თუ არ ვიცნობ, მინდა იყოს კარგად და ყველაფერი შეძლოს. იმის ნაცვლად, რომ ერთმანეთი გავახნევოთ, ასეთი დამოკიდებულება ჩემთვის უცნაურია. მე მაინც ყველას საუკეთესოს ვუსურვებ.
– თქვენთან ერთად ვინ გამოფრინდა?
