უკრაინაში ვითარება ისევ დაძაბულია. შეტაკებები შეწყდა, მაგრამ დემონსტრანტები პროტესტის ახალი ტალღისთვის ემზადებიან.
ოპოზიცია ხელისუფლებასთან დიალოგს წყვეტს და აფართოებს არეალს. 5-საათიანი უშედეგო მოლაპარაკების შემდეგ ქალაქში დამატებითი ბარიკადები გამოჩნდა, მათ შორის პრეზიდენტის ადმინისტრაციასთან.
დაიკავეს კრეშატნიკზე აგროპოლიტიკის სამინისტროს შენობაც. ღამემ შეტაკებების გარეშე ჩაიარა, დღეს დილიდან კი გრუშევსკიზე ხალხის ნაკადი იზრდება, ისევ იწვის საბურავები. პარალელურად, მობილიზებულია “ბერკუტიც”. ჯარი სტადიონთან დგას. იანუკოვიჩთან კი ეშტონი და ფულე მიემგზავრებიან. ევროკავშირი კიევში ევროკომისარს და უმაღლეს წარმომადგენელს სპეციალურად აგზავნის, რომ ხელისუფლებასა და ოპოზიციას შორის დიალოგი დაიწყოს.
იანუკოვიჩი დათმობაზე არ მიდის. ოპოზიციას ქვეყნის პრეზიდენტმა მთავარ მოთხოვნაზე უარი უთხრა, გადადგეს და გადააყენოს მთავრობა. უკან დახევას არც ოპოზიცია აპირებს. დედაქალაქთან ერთად საპროტესტო ტალღა უკვე ქვეყნის თითქმის ყველა რეგიონს მოედო. ჩერკასკი, ტერნოპოლი, ლვოვი, ჟიტომირი, როვნო. გუბერნატორები გადადგნენ. ევრომაიდნის მხარდასაჭერად აქცია იყო მოსკოვშიც.
24.01.14
