საქართველოს ფინანსთა მინისტრი ნოდარ ხადური ევროპის რეკონსტრუქციისა და განვითარების ბანკის (EBRD) ყოველწლიური შეხვედრის თბილისში გამართვას “საქართველოს ისტორიაში უნიკალურ შემთხვევას” უწოდებს.
“როგორც თქვენთვისაა ცნობილი, საქართველოს პრემიერ-მინისტრისა და ევროპის რეკონსტუქციისა და განვითარების ბანკის პრეზიდენტის დავოსში გამართულ შეხვედრაზე პირველად გაჟღერდა, რომ თბილისი 2015 წლის 14-15 მაისს უმასპინძლებს ევროპის რეკონსტრუქციისა და განვითარების ბანკის ყოველწლიურ შეხვედრას. ჩვენ აღნიშნული ღონისძიების მოსამზადებლად 8 თვის განმავლობაში ვმუშაობდით – სექტემბერში თბილისს ეწვია EBRD-ის შემფასებელი მისია, რომელმაც შეამოწმა ინფრასტრუქტურა და ის, რამდენად მზად ვართ ასეთი ღონისძიების ჩასატარებლად. ეს იქნება ძალიან კარგი საივესტიციო ფორუმი და დარწმუნებული ვარ, ძალიან დიდ შესაძლებლობას მისცემს საქართველოს”, – განაცხადა ნოდარ ხადურმა დღეს გამართულ პრესკონფერენციაზე.
ამასთან, მისივე ინფორმაციით, აღნიშნულ ყოველწლიურ შეხვედრაში მონაწილეობის მისაღებად თბილისში 1 500-ზე მეტი ბიზნესმენი ჩამოვა.
“ევროპის რეკონსტრუქციისა და განვითარების ბანკი არის ჩვენი ერთ-ერთი ყველა დიდი ინვესტორი, ის 20 წელია საქართველოში მუშაობს. მისი დამფუძნებელია 60 ქვეყანა და მათი დელეგაციები ეწვევიან საქართველოს. უფრო კონკრეტულად, 2015 წლის მაისში თბილისში ჩამოვა 34 ქვეყნის ფინანსთა მინისტრი და დანარჩენი ქვეყნების სხვა მინისტრები. ჩამოვა 1 500-ზე მეტი ბიზნესმენი. ესაა უნიკალური შემთხვევა საქართველოს ისტორიაში. ასეთი მასშტაბური ღონისძიება საქართველოში არ ყოფილა, არ ყოფილა არც კავკასიაში”, – აღნიშნა ფინანსთა მინისტრმა.
ნოდარ ხადურის განმარტებით, საქართველოს, როგორც EBRD-ის ყოველწლიური შეკრების მასპინძელ ქვეყანას წელს ვარშავაში, ანალოგიური ტიპის ღონისძიებაზე ოფიციალურად წარადგენენ.
28.01.14
