ბიძინა ივანიშვილი სუროგაციის შესახებ პატრიარქის ეპისტოლეს არ ეთანხმება. ამის შესახებ საქართველოს ყოფილმა პრემიერ-მინისტრმა, ბიძინა ივანიშვილმა მის მიერ დაფუძნებული არასამთავრობო ორგანიზაციის “მოქალაქე” პრეზენტაციაზე განაცხადა. ამით ივანიშვილი სურიგაციის შესახებ პატრიარქის ეპისტოლეს გამოეხმაურა.
“მეც შევდივარ საზოგადოების იმ ნაწილში, რომელიც უდიდეს პატივს სცემს საკუთარ ისტორიას, ტრადიციებს, საკუთარ ეკლესიას, მართლმდადიდბლობას. უდიდეს პატივს ვცემ თვითონ პატრიარქს, ძალიან თბილი ურთიერთობა მაქვს მასთან და ძალიან მიყვარს. მაგრამ საზოგადოებამ უნდა გადალახოს ის ბარიერი, რომ ეკლესიის თემა არის ტაბუდადებული და იქ რაც ითქმება და როგორც ითქმება, არის უმწიკვლო და ხელშეუხებელი. პატრიარქი ბრძნებს, თუ ეკლესიის სხვა მსახური, ეს დამოკიდებულება, ჩემი აზრით, არის ზედმეტად გაფეტიშებული და გადაჭარბებული. ეს არ უნდა იყოს ასე. ამას არ საჭიროებს არც პატრიარქი და არც ეკლესია”,-განაცხადა ივანიშვილმა.
მისივე თქმით, მისი აზრია, რომ ეკლესიაში არანაკლები პრობლემებია, ვიდრე საზოგადოებაში.
“ასეც უნდა იყოს, რადგან ეს ჩვენი საზოგადოების ნაწილია, ეკლესიის მსახურნი არიან ჩვენი თანამოქალაქეები. დამოკიდებულება რაც არსებობს, რომ ეკლესიის თემა არის ტაბუდადებული, ჩემი აზრით არის შეურაცხმყოფელი ჩვენი საზოგადოებისთვის და არ საჭიროებს ამას თვითონ ეკლესია და არ არის სწორი საზოგადოების ეს დამოკიდებულება.
ისევე შეიძლება კრიტიკა, ისევე შეიძლება შეეშალოთ იქაც, იქაც შეიძლება მოხდეს ცუდი ამბები, გაუგებრობა, დარღვევები ეკლესიაში და არის კიდეც. ჩვენ ეს კარგად ვიცით. იქაც არის და ნუ გეშინიათ ამაზე საუბრის. თუ გინდათ რომ უკეთესი იყოს, ჩვენ უნდა ვისაუბროთ. ისინიც საჭიროებენ კრიტიკას, ისინიც საჭიროებენ მითითებას”,-განაცხადა ივანიშვილმა.
მისივე თქმით, სუროგაციის თემამ დიდი ვნებათღელვა გამოიწვია. “ამ დროს ყველას შეიძლება შეეშალოს, პატრიარქსაც შეიძლება შეეშალოს. პატრიარქმა შეიძლება ბრძანოს ის, როგორც თვითონ უყურებს, მაგრამ ჩვენ არ გავზიაროთ. ეს ნორმალურია, არ გვინდა ეს დოგმები.
თუ გაიხსენებთ ისტორიას, ეკლესია წამლების წინააღმდეგიც იყო. დღეს მშვენივრად წამლობს ყველა. როდესაც ცოლ-ქმარს საშუალება არა აქვს, შვილის გაჩენის, ამაში მედიცინა ერევა, ახალი სიცოცხლე ჩნდება და არ ვიცი ახლა, აქ საკამათო არაფერი არ არის. შეიძლება ოდნავ საკამათო იყოს ის სუროგატი დედა, რაზეც კანონდებლობას უნდა დახვეწა. ძალიან ბევრი გაზარმაცებული ქალბატონია, რომელსაც ყველა საშუალება აქვს გააჩინოის და ამის სურვილი არ აქვს, ეს სხვაა”,-განაცხადა ივანიშვილმა.
მისივე თქმით, საქართველოში სურიგაცია გაგონილიც არ ჰქონდათ, როდესაც მის ახლობელს დაეხმარა სურიგაციის გზით ბავშვის გაჩენაში.
“10 წელი შვილი არ უჩნდებოდათ და ახლა ძლიან საყვარელი შვილი ჰყავთ”,-აღნიშნა ივანიშვილმა.
04.01.14
