საქართველოს პრემიერ-მინისტრთან რელიგიის საკითხთა სახელმწიფო სააგენტო შეიქმნა. შესაბამისი გადაწყვეტილება მთავრობამ დღევანდელ სხდომაზე მიიღო.
როგორც სხდომის შემდეგ სახელმწიფო მინისტრმა შერიგებისა და სამოქალაქო თანასწორობის საკითხებში პაატა ზაქარეიშვილმა განაცხადა, სააგენტო საჯარო სამართლის იურიდიული პირია და მისი დებულებაც უკვე დამტკიცებულია.
“როგორც იქნა, საქართველოში იარსებებს სახელმწიფო სტრუქტურა, რომელიც განახორციელებს რელიგიური საკითხების შესახებ პოლიტიკას. აქამდე მსგავსი რამ არ არსებობდა. მე ვიღებდი დავალებებს პირადად პრემიერისგან, რომ ამა თუ იმ საკითხში ჩავრეულიყავი, შესაბამისად მნიშვნელოვანია, რომ სპეციალური სტრუქტურა შეიქმნა”, – განაცხადა ზაქარეიშვილმა.
სახელმწიფო მინისტრის ინფორმაციით, სააგენტოს ერთ-ერთი ფუნქცია იმ თანხის განკარგვა იქნება, რომელიც სახელმწიფოს გადაწყვეტილებით რელიგიური კონფესიებისთვის ზარალის ანაზღაურების მიზნით გამოიყო.
“სააგენტო ასევე დაინტერესდება განათლებისა და საკუთრების საკითხებით. სააგენტო იმუშავებს პრემიერ-მინისტრთან, ვინაიდან გვსურს, იყოს ძალიან მაღალი სტსტუსის. ვინ უხელმძღანელებს სააგენტოს, ეს ჯერ ცნობილი არ არის. ამ თემაზე გადაწყვეტილებას პრემიერ-მინისტრი მიიღებს”, – განაცხადა ზაქარეიშვილმა.
სახელმწიფო მინისტრის ინფორმაციით, სააგენტო იმუშავებს იმ 4,5 მილიონიანი დაფინანსების ფარგლებში, რომელიც სახელმწიფომ რელიგიური კონფესიების დასახმარებლად განსაზღვრა.
07.02.14
