ნავთობპროდუქტების იმპორტიორთა კავშირის ორგანიზებით, სასტუმრო ” ქორთიარდ მარიოტში” ტრადიციულად, უკვე მეცხრედ ნავთობპროდუქტების ბიზნეს-სექტორის 2013 წლის შედეგების შემაჯამებელი ღონისძიება გაიმართა. ღონისძიებაზე მოქანდაკე ირაკლი წულაძის ნამუშევრები და სპეციალური დიპლომები გადაეცათ იმ ნავთობკომპანიებს, რომლებმაც სახელმწიფო ბიუჯეტში ყველაზე დიდი რაოდენობის თანხა შეიტანეს.
გარდა ამისა, დაჯილდოვნენ ბიზნეს–სექტორის ყველაზე დიდი დამსაქმებელი და მნიშვნელოვანი სოციალური პროექტების განმახორციელებელი კომპანიები. ნავთობპროდუქტების იმპორტიორთა კავშირმა ღონისძიებაზე სხვადასხვა ნომინაციებში გამარჯვებული კომპანიებიც გამოავლინა.
2013 წელს ნავთობპროდუქტების ბიზნეს–სექტორის ყველაზე დიდ დამსაქმებლად „ვისოლ პეტროლიუმ ჯორჯია“ დაჯილდოვდა. როგორც ჟურნალისტებს „ვისოლ პეტროლიუმის“ გენერალურმა დირექტორმა ვასილ ხორავამ განუცხადა, წელს კომპანიამ 5000–მდე ადამიანი დაასაქმა და ბიუჯეტში გადასახადების სახით დაახლოებით 70 მლნ ლარი შეიტანა.
„ჩვენი წლიური ბრუნვა 350 მილიონ დოლარს შეადგენს. კომპანიაში 5 000-მდე ადამიანია დასაქმებული. ვისოლი ბაზარზე წარმოდგეილია 125 ბენზინ გასამართი სადგურით. აღსანიშნავია, რომ ინტეგრირებული სათბურები ბაზარზე ვისოლმა პირველმა გააკეთა. კვლევის შედეგად ბერძნულ პროდუქტებზე საკმაოდ დიდი ინტერესი დაფიქსირდა და ჩვენ დავიწყეთ მაღალი ხარისხის საწვავის იმპორტი საბერძნეთიდანაც. მოგეხსენებათ, რომ იმპორტიორთა კავშირის ეგიდით მეცხრედ ტარდება შემაჯამებელი შეხვედრები, როცა კომპანიები განვლილი წლის განმავლობაში განხორციელებული პროექტების შესახებ ანგარიშს წარმოადგენენ. ჩვენვთვის, კომპანია ვისოლისთვის 2013 წელი უმნიშვნელოვანესი წელიწადი იყო და ხდება იმ შედგების შეჯამება, რომლითაც კომპანია ვისოლი გამორჩეულია და რომელიც დღევანდელ ნომინაციებში გამარჯვებით დაგვიფასდა.“ – განაცხადა ვასილ ხორავამ.
„ვისოლ პეტროლიუმ ჯორჯიას“ პრიზები გადაეცა 2013 წელს მნიშვნელოვანი სოციალური პროექტების განხორციელებისათვის, კომპანიამ წელს სხვადასხვა პროექტების დაფინანსებისთვის, 26 მილიონი ლარი გამოყო.
კომპანია „სოკარ ჯორჯია პეტროლიუმმა“ ნავთობიმპორტიორთა დღევანდელ დაჯილდოებაზე 3 ნომინაციაში გაიმარჯვა. „სოკარი“ ნომინაციების – 2013 წელს სახელმწიფო ბიუჯეტში ყველაზე მსხვილი გადამხდელი ნავთობკომპანიაა, საქართველოში ყველაზე დიდი ინვესტიციებისა და სოციალური პროექტების განხორციელებით გამოირჩეოდა. როგორც დაჯილდოებაზე „სოკარის“ წარმომადგენლებმა აღნიშნეს, სოციალური პროექტებისთვის 2013 წელს 78 მილიონი ლარი დაიხარჯა,ხოლო მთლიანად სახელმწიფო ბიუჯეტში კომპანიამ 130 მილიონი ლარი შეიტანა.
დაჯილდოების ცერემონიას საქართველოს რეგიონალური განვითარებისა და ინფრასტრუქტურის მინისტრი დავით ნარმანია ესწრებოდა.
“კომპანიები, რომლებიც მთელი წლის განმავლობაში დაუღალავად მუშაობდნენ, საქმეს აკეთებდნენ, უნდა იყვნენ მოტივირებულები და სასურველია, რომ ყოველწლიურად ქვეყანაში გაკეთდეს მსგავსი ღონისძიებები. უნდა გვქონდეს ხარისხიანი ბიტოლი, რომლის იმპორტსაც ეს კომპანიები აწარმოებენ მათი საშუალებით ავაგებთ ხარისხიან გზებს და აღარ მოგვიწევს მათი ორ–სამ წელიწადში ხელახალი რეაბილიტაცია. მადლობა მინდა გადავუხადო თითოეულ კომპანიას და ნავთობპროდუქტების იმპორტიორთა კავშირს დიდი ღვაწლისთვის,“ – აღნიშნა მინისტრმა.
ღონისძიებას მთავრობის, სახელმწიფო სტრუქტურების, დიპლომატიური მისიების, საერთაშორისო თუ არასამთავრობო ორგანიზაციების საქართველოში მოქმედი და ასევე უცხოური ნავთობკომპანიების წარმომადგენლებიც დაესწრნენ.
14.02.14
ნათია კეკენაძე
