პარტია “უდარისა” და უკრაინული ოპოზიციის ლიდერი, ვიტალი კლიჩკო ძალოვანებს მიმართავს და მოუწოდებს, არ შეასრულონ ხელისუფლების დანაშაულებრივი ბრძანებები.
“მივმართავ ყველა ძალოვანს – “ბერკუტისა” და შინაგანი ჯარების მებრძოლებო, ნუ შეასრულებთ დანაშაულებრივ ბრძანებებს, დაიცავით ხალხი! დანებდით და ხალხი აქედან ცოცხლად გაგიყვანთ, მაგრამ ნუ ისვრით. ეს ძალადობა უნდა შეჩერდეს და თქვენ შეგიძლიათ ამაში დახმარება”, – ნათქვამია კლიჩკოს მიმართვაში, რომელსაც პარტია “უდარის” პრესსამსახური ავრცელებს.
ამასთან, ვიტალი კლიჩკო მოუწოდებს სნაიპერებს, დატოვონ შენობების სახურავები. მისივე თქმით, იანუკოვიჩის სავარძელი არ ღირს ამ მსხვერპლად.
ვიტალი კლიჩკო ასევე აღნიშნავს, რომ იმ ძალოვანებს, ვინც ხალხის მხარეს გადავა, უსაფრთხოების გარანტიები ექნებათ.
უკრაინულ მედიაში გავრცელებული დაუზუსტებელი ინფორმაციით, ბოლო მონაცემებით, დღეს განახლებული ძალადობრივი დაპირისპირების შედეგად დაღუპულთა რიცხვმა 30-ს მიაღწია.
20.02.14