დღეს, სასტუმრო “რედისონში”, საქართველოს ეროვნული საინვესტიციო სააგენტოს ორგანიზებითა და საქართველოს საგარეო საქმეთა სამინისტროს მხარდაჭერით, ქართულ-გერმანული ბიზნეს ფორუმი გაიმართა, რომელშიც მონაწილეობა ქართული და გერმანული კომპანიების, გერმანიის ეკონომიკური გაერთიანების, საპარტნიორო ფონდისა და საქართველოს თანაინვესტირების ფონდის წარმომადგენლებმა მიიღეს. შეხვედრაზე საინვესტიციო პროექტების განხორციელებისა და პარტნიორობის შესაძლებლობები განიხილეს.
ღონისძიებას საგარეო საქმეთა მინისტრი მაია ფანჯიკიძე და საქართველოში ორდღიანი ვიზიტით მყოფი ენერგეტიკის საკითხებში ევროკომისარი გიუნტერ ოტინგერი დაესწრნენ.
მაია ფანჯიკიძემ დამსწრე საზოგადოებას სიტყვით მიმართა. გამოსვლისას მან აღნიშნა, რომ გერმანია მსოფლიოში ერთ-ერთი ყველაზე ძლიერი და სტაბილური ეკონომიკის ქვეყანაა რომელსაც შეიძლება ინტერესი გაუჩნდეს საქართველოს, როგორც პროგრესულ გზაზე მდგომი ქვეყნის მიმართ, სადაც საკუთრების უფლების პატივისცემა, მეწარმეთა საქმიანობაში სახელმწიფოს ჩაურევლობა, კანონის უზენაესობა, სოციალური სამართლიანობა და სოლიდარობა, ბაზრის ლიბერალიზაცია, ორმხრივი ვაჭრობის ხელშეწყობა და სხვა ფაქტორები მდგრადი ეკონომიკის განვითარების მყარ საფუძველს ქმნის.
„დარწმუნებული ვარ, რომ გერმანია მომავალშიც მნიშვნელოვან როლს შეასრულებს ჩემი ქვეყნის განვითარებაში. ჩვენ პოზიტიურად ვუყურებთ მომავალს, და მიუხედავად ჩვენს წინაშე არსებული სირთულეებისა, ყველაფერს გავაკეთებთ იმისთვის, რომ საქართველო ევროპულ სტანდარტებსა და ღირებულებებს დაუახლოვდეს“ – აღნიშნა მაია ფანჯიკიძემ.
21.02.14